كزهر الموت.... أو أقرب - (إلى محمود درويش)

كزهر الموت.... أو أقرب

(إلى محمود درويش)

د. محمود إسماعيل خليل

مِتِل زهْـر اللـّـوز

عم ترحـلْ....

وتدبلْ معك

بيـّارة الأحـلام....

يا جسر عَ مْطـلِّ الوطـن

و كلّ القـوافـي

بْغيـبتـَك بتنــام....

قالــوا: الصـّوم ابْتدا

قلتْ: الكــلام هـْـلال

بيطـِلّ حرف الوقت

وِمْنِفْـطـَر بْشـوّال

يا ريت صوتَـك شهـر

يا ريت شهـْرَك دهـر

ويا ريت شعبـان انتهى

ومـا خلصت الإيـّام...

مشغول بيـّاع الكفن

و الكفـن كـوفيــّـة

مـرّوا

عـَلـى درب الصـّلا

شي خمس ستّ رجـال

ملعـون بـيّ الكذب

يِمْكِن خمِسْمِيــّـة

و خيـّال عَ ضهْر الفرس

و الهودَج بـْ عـكــّا

حنـّوا كفـوفُن بالحزن

ضـاع الفرح بالشـّام...