حـواريــّــة.....!
حـواريــّــة.....!
د. محمود إسماعيل خليل
سألتني كيف تكتب الشـّعر..؟ قلت ُلها أنا لا أكتب الشـّعر
الشعر هو من يكتبني...!
إنه يبحرُ في دمي يفجر آباراً من مدادٍ .. ينحتُ عظامي
ويصقلها لتصبح أقلاماً... فأكتب بخطّ الرقعة والثلث والكوفي
والديواني.... ومرّات كثيرة أرسم بها الجنون
الشعر يزورني عندما يريد أن يكون شعراً ... حتى في لحظات النوم يوقظني ويقول لي أكتب..!
عندها أصبح أمـّيـّاً...!
وأصارحك أنني عندما يأتي ذلك اليوم الذي تفارق فيه روحي الجسد..... الله وحده يحيني ...... والشـّعر..!
ـــــــــــــــــــــــــــــــــــ
حوارية القمر والشّمس... لإيريس...
لروح إيريس التي تحبّ الشّعر
قال القمر للشّمس:
نيـّالـِك...!
نورك مِلي هالكون
و وجودِك سلامْ..
يا ريتـْني مِتلك
ما إسهر ليل
يا ريتـْنِي متـْلـِك
شي ليلة نـــــــامْ...
فاقـِت الشـّمس
و ضحكـِت بسرّا..
و مشْط الدّهب
غفيان عَ الْغِرّة
قالت: إنتْ
يا لهفة المشتاق
عَ طلعتك
بيدوب قلبو فْراق ..
بْيكــْفي بإنـّـك
عَ مدى الإيـّام
إسمك هـَيـَامْ
و بالهوى شيخ الغرام....
ـــــــــــــــــــــــــــــــــــ
حوارية الياسمينة والعصفور.... لسوزان...
ياسمينة جماليا
(الياسمينة): يا مرحبا
بالـْ غاب عن عيني
سنة و أكتر.....
يمكن نـِسي
يمكن قـِسي
أو يمكن تكبــّر...
بعدَك بتفرُد جانحـَك للرّيح
و ع َ غيبـْتـَك
بيصير بـِ وجّي
الفرح أصفر....
نيـّال قلبك
بيتك بْوِسع السـّما
وبْمجِيـتـَك
بنسى الهمس
و بصير إحكي بالوما
خلـّيك حدّي
ما بقى تحرُز
بْقلبــي الأبيض
ضمـّك و نسهر....
(العصفور): صدّقيني
كتير عم بشتـاق
لـَ شوفك...
و لمـّن بشوفك
بتنكس جروحي
بشوفك متل فسحة
جوّات حلم ظغير
و ما بصدّق بشوفـِك
إلا و بتروحي...
عـِطرك
متل (قونة) بِريشـاتي
مهما غبتْ
بتردّني لـ ْذاتي...
و مهما كـْبرتْ
بـِ غربة الإيـّام
برجع لحضنـِك
بالعطر إسكــــــر.....
ـــــــــــــــــــــــــــــــــــ
حواريّة الشيخ والبحر.. لندرة ع. يازجي..
أجمل الشعر ما تسمعه العين.
(الشيخ) : صرلـَك عـُمر
عم تجبـُر الخاطــِر...
ملحـَك جرح
و الشّمس هدّتني
دوبت بعيوني الزّبد
كاسات
و حـْفـَرْتْ عَ خدودي
العمر نهدات...
إنت و أنا
تنيناتنا مجانين
مدري أنا
عمْ سافـِر بـْبحرَك..؟
مدري إنت
بـِ شيبـْتي مسافر....؟
(البحر): رفقة أنا و يـّاك
من مدّة...
لا إنتْ منـّي بتسْتـَقيل
و لا أنا بدّي...
بتنشـُر شباكك
عَ الصـّبح بكير
و بتاخد شخاتير
و تودّي..
لا إنت طِلْت الدّر
و المرجان
و لا الموج هدّك
يا إبن أيـّوب.... يا صابـِرْ
حواريـّة العاشق والقلب.. لدريد يازجي...
الغـالي
ـــــــــــــــــــــــــــــــــــ
(العاشق): حلـّك يا قلبي
يا طفل يا ظغير
ترتاح من عشقك
يا عشق كبير
كان الهوى
متل الدّلو
متعمشق بحبل الوجع
ليش انقطع
حبل الهوى
و ضاع الدّلو بالبير...
(القلب): قدّيش قلت:
اليوم آخر يوم...
حلــّو النـّعس
يسرق من جفونك
حلم للنــّوم....
غصـّت حروف الشّوق
انكسرت الكلمات
و شو نفع هجّ النـّحل
و اشتاق القفيــــــــر....
ـــــــــــــــــــــــــــــــــــ
حوارية الحب... إلى جولييت ...
محبة وتقدير
(الحبّ): قولي بـْحبـّك بعشقك
لا تسـْتـِحي...
إنتي الهوى .. الروح القدس
إنتي الوحي...
قبلك كنت موسى
و ضعت بالتيه
و بعدك أنا يُوسُف
إيدَيـّي بْتجرحي....
محبتي و تقديري لكم جميعاً أخوة لي لم تلدهم أمي