"غــزل" أبجديـّة العشق...

 إلى ابنتي "غزل" وجميع أطفال العالم

رِفـّي .....

عَلَى جْـوانِحْ حِـلمْ

يا زَنْبَقِةْ هَالْكَـون......

وِتْحَلــّــــــي...

وْضُـمـّي

لَغـُمرين الدّفـا

قلبي اللّي شاب

مْنِ التـّعب وِالهـَـمّ وِالقِلــِّـة...

يا حَبــِّـة اللّولو

وِمْعَتــَّـقة مْن سْنين...

يا سْراج عمري

الـْ ماْانْطَفَـى

وْماْبْينْطَفي تِخْمين....

حُسن القمر

يِنْقَص عَلَى مَرّ

 الشّهر...!

إلا جمالِكْ يـا غزل...

دايِـمْ عَـلَى الْهِلــِّـــة....!

حلـِّي الضّفايِر

 دَهَبْ...

وْميـْـلي...

عــ َميل القصبْ...

يا أبجديــِّةْ عِشْقْ

مِن قبل الدّني

 ما تكـون..

طاب الجَنـى

مِن مَبْسَمـِك

يا طـِيْــب هالْغَلــِّـــة....

و النـُّون

حرف ارْتَسَمْ

حاجِبْ تحت غِرَّة

مِحـْـني

مِتِلْ سَيف العرب..

طعْم العَطِشْ

مَرْسوم عَ الجَـرَّة...!

وِالعَين

كَوثَرْ عَسَلْ

عا دَقــِّـة المِهْباج

يِنـْـدَه 

عَلَى بِنّ اليَمَن

مصْمـُـــود بالسـَّـلــَّــة....

وِالصّدْغ

حرْف الْوَاو

وِالشّعْر انْسَكَب....

مِتْل الدّهَبْ

مَسْكُوبْ

بِصْواني حَلَبْ

وْ غِمّـازِةِ الـْ عَ الْخدّ

عَمْ تِنْطُر حَـلا

حَبـِّـة عنبْ....

عنْقـــــود متدّلـــي....

ما بْشَبـّهـِكْ بالورد...

وِالوَرْد رَح يِفـْـنى...!

وْلَو صـار .. وِمْرَقْـتي

بْدِنْيـا الْبَشر

شي نْهـارْ

بيْفَكّـروا أنُّـو الـْ مَرَقْ

مِنْ جَنْبهُن عَطــّـارْ

وْلَو تِقْشع

عْيـُون النّسـا حُـسنـِكْ

مَاْ كـانوا قَطـَّـعوا

 دَيْهُن....

كانت عُيُونُن عـِمـِتْ

مِنْ رَوعِة الطــَّـلـــِّــــة....!