مسكون فيكي

مَسْكون ....

فيكي أنا

والعمر عم يـِمْـرُقْ....

مِتـْل البحر

مسكون بالشـَّط ّ المـَرَة

مِحتار

بـَنْ مدّ وْجَذر

والوقت عم يغرقْ.....

مسكون فيكي

يا أنا الخِـتْيـار.....!

عُودو انْحنى

وْحامِل عَ ضَهْرو حْجار...

وْعِكـّازْتـُو

تِنـْطُر عَ مَفْرق مَوت

خيطـان الكَفَنْ...

وْمـافي طريق

وْلا بقي مَفْـرَقْ......

مسكون فيكي

وْيِمْكـِن... إنتي السّاكنة فيّي

مِتْل الجذرْ...

بيْغـِلّ بِشْرُوشو

غَصِبْ.

مِتِلْ حَبـّة قمحْ

جوّا التـّراب

تْصيـح... بدي مَيّ

وِتْمِدّ دَيْهـا فَوق... تاتِخْلقْ.....

مسكون فيكي

لأ..... إنتي السّاكنة فيّي

مِتْنـا سوى

مِدْري بْأيـّا وقتْ

مِتْنا.... بْصمْت

واليوم رَحْ نِخْلـَقْ

بِنْت وْصَبـي

بَيْنـاتْهُن مَوجـِة وَصِلْ

هيّي.... حبل سِرّة

ما بْيـِنْفصِلْ

عن رحمْ بَحْرُو.... والبحر أزرقْ....