ضوّيتلك شمعة

ضوّيْتِلِّك شمْعَة

أنا والعيد.....

وْوَدَّيْتِلِّكْ قلبي

يوقف عَهاك الباب…..

وْدَقّ القلب

تامَلّ قلب الباب

ما في حدا

يِمْكِن مِشُوا الحْباب….

*             *            *

يا بابْها.....

يلّلي العمر

بيْمِرّ مِن حــدّو

بْينْدَه عْلَيها

بْلَهْفِة الْبَدُّو

 وْما بَدُّو......!

الليل وْأنا

رح إنْطرِك وِيْشيب

ليل الهوى

وبعدو القلب ما شاب.....!

*            *            *

وْهَونيك

عاضوّ القمَر

في بَيت مِن قرْميد

قِدَّام مِنُّو مَصْطَبِة

رِبْيُوا عْليها وْلاد

وْهبّ العِمِر

مِن صَوْبُن وْفَلــُّــوا

تَرْكُوا وَرَاهُن

دَفْتَرُنْ وِكْتــــــــاب......

*                *            *

إيــــه.......!

يا رِحْلِة عُمر

عَمْ إذكْرِك بالعيد

ليْكِي الوْلاد

تْغَرّبوا

وْما عاد في أولاد

كِبْرُوا متل

صِدْفِة

وْماعادوا تْجَمَّعوا

نسيوا بِالخْزانِة

اللِّعَبْ

وِمْعَلـّقة التْيــاب.......!

*              *                *