غـفـوة....
احْضِنيْنـي
وْلَفِلْفي عْيونــي
بـِ قَبِّـة الْفِسْتــانْ
وْحِلْفُوا جْفوني
يِسْهَرُوا بْهاللّيـل
تايِقْشَعُوا عَ شْفايْفِك
جَوْز الْحمامْ...
جَوْز الْحَمـام
اللِّي انْدَبَح تَـ يْنام
طِفْل انْخَطَفْ
مِنْ خَيْمْةِ الأحْـلام
وْكِبِر الطّفِلْ
بِيْغَيْبْتِكْ يَـ اْمـِّي..
وْهَجِّ الْحَمـام
وْما بِقِي بِسْتــــانْ
وَيْنَا اللّي كانِتْ
تِمْسَح الدَّمْعـات..؟
مْنِ عْيـُون
تِرْقُص
ناطْرَة حْكـايات...!
وَيْنـُـو
الْمـَرْيـُول
الـْ غِفِي عَ الْحَيـْط...؟
عَمْ يِنْكَوَى
بـْ حِنـِّيـِّةِ الْلَّمْسات..!
وْوَيْنا اللِّي كانِتْ
تِحْرُق الْبَخُّـورْ
بْإسْم الْمَسيـْح
وْوِجـّها قــــرآنْ
جوعان
يَـ اْمـِّي...
وْإنْطُرْ التـَّـنور
بَلْكي عَ رِيْحِةْ
عَجِنْتِـك بيْفُـور
وْطُوفان شَوْقِكْ
يِلْفَح عْيُوني
وْيِرْسُمْ
عَلَى خْدُودِكْ زَهِرْ رِمَّانْ
غَفْوِةْ حِلِمْ...!
يا رَيْتْهـا بِتْدُومْ
وْحِضْن الْحَبَقْ
مِشْتـاق لِلْمَحْرُومْ
غاب الحِضِن
بـِ غَيْبْتِكْ يَـ اْمـِّي...
وْصار الْحَبَق
عاغَيْبْتِكْ إنســـــــــانْ...!
