حوريّة البحر

الرَّمْل انْزَرَعْ

عَ حْفـاف إجْرَيْها

وْنـام الدَّفـا

بْصابيع إيْدَيْهـا

مِنْ لَمْسِة الإيْدَين

رَسْمِتْ عَ الرّمل

شَتْلِة ....

انْشَقّ الرّمل

مِنْ تَحِتْها مَنْتـُــــورْ

عانَقْ جِسِمْها

الزّبَد..

وِتْنَهَّدُوا المَوجاتْ...

وْهــاج البحر

وِالْمَيّ عَمْ تِحْلَى

نِسْيـُوا الشّمس

وِالْفَيّ

وِاللِّي خـِفي أحلى....

فِنْجـانْ قَهْوِة

سِكَّـر زْيادِة

وْيِمْكِنْ عِنِبْ مَعْصُورْ...

السَّمْكـات

مَرّوا حَدّهـا غارُوا

وْلُولُو الصِّدَفْ

عِشْقـان عِشْتـارو

فينـوس طـَلـِّتْ

عالزّبد صدفة

فـاق الزبد

مِنْ بَعْد نَوم دْهــــــــورْ

نِيـَّال مَوْج الْبَحر

بْحِمْرِة شْفافِك

وِالشَّعر شَلاّل

انْسَدَل غِفْيان

عَ كْتـافِـكْ

جَنُّوا عْيوني

صِحْتْ:

يا ربّ السَّما....

عُمْرَكْ شِفِتْ

عاج انْسَكَبْ

عا صفْحِة البَللـُّـــــورْ.....!