جبل الشّيخ

أبعد من حْدود الدِّني

تاكي عَلى جْبين القمرْ

مدنَّقْ

وْتـَلج انْغَمَرْ

راكع عَ كِتْف الْغَيم

وْمش بالدِّيانِة بْيِعْتِني

*

وشيخ إسمو،

بْعَكْس الْمَشايِخ

واقِفْ يْصَلِّي لِلْمَدى

بْعِفِّة

مِدْرِي لِبِسْ لَفِّة

مِدْري شَعِرْ شايِبْ

أو تَلْج

مش صايِخْ

وْطَلّ وِجّ الضَّوّ عالِبْنـان

حْبال الشَّمِسْ مِنُّو بْيِتْدّلُّـو

سبْحان ألله شو حُلُو

مَنْظَرْ طبيعي

زِيْنِةِ الأكْــوان

مارِدْ بَلا شِرْفِة

مابْيِنْحِنِيْـلُو جْبيـنْ

بِتْشُوف مِنُّـو اللِّدْ بِفْلِسْطيـن

وِبْتِقْشَع الضِّفِّة

*

عِمْــلاق عِتْقي مْشّيِّب الأزْمـان

الفْجَرِ ْبيْجَهْجِه إلـُو

وْبِيْلُوح

وْعِنْق الشَّفَقْ عاقِمّـتُو مدبـُوح

هَيْدا جَبَل مِنْ هَون مِن لبنـان

حْكايِة عَتيقَة قَدّ عُمْر الدّهْر

بِيناطِح الزّرْقـا تـَ يِحْكيها

والشّمِسْ تَلْجاتُو تْدّفِّيـها

عُمْرا تْنَعْشَر شَهِرْ

بِتْضّلّ مـا بِتْدوب

شْمال وْشَرِقْ وِجْنُوب

أعلى جَبَلْ مَحْسُوب

بْقَلْبُو جْبـال وْنَهِرْ

هيـْدا جَبَلْ حَرْمونْ

شَيْخ وْصَعِب تـَ يْشيـْخ

مْعَمْشَقْ عَلَى الْمَرِّيـخْ

خّرْطَشْ إلو التّاريـخْ

مِنُّـو بْتِقْشَعْ

قُبْرُصً وْقَسْيُـونْ.