لا ترحلي

لا ترحلي

باسم قباني

بلادِك ال كانت بالقصف والنار

من قبل مدِّة كتير شِعلاني

كانت مَلاني مْن الغِرِب كفار

وأشباح موت كتير ملياني

تركتي حِماها مِنْ تَلات سنين

دجلة على بعدك صفي ختيار

وآذار فيها بغيبتك تشرين

ووقت اللّي جيتي عا بلادي صار

تشرين عمري بطلّـتك آذار

وهلق نَويتي ترحلي معقول ؟

لا ترحلي ضلّي العمر حدّي

لا بْغيبتك مجد الأرض بيزول

ولا الأرض برْجوعك رح تْندّي

قالت بِكفّي هالعيون السود

تبكي ودخيلك حاجتِك تحكي

بلادي بْتِنطر عا رْبوعا نعود

وأكتر ما إنتَ بكيت عم تبكي

وأكتر ما إنت سهرت ع الشباك

تَ تلمح خيالي أنا وعمّ مِرّ

سهرِت تْصلي بْصومعة نِسّاك

نرجع عَليها تا نْحلّي المرّ

بلادي الحلا والخير والأزهار

جْناين معلّق بالسّما فيها

بتروح ع بلادي معي مشوار

سنين العمر هونيك نِقْضيها

قلتلّها لا لا أنا ما بروح

في غيبتك بفزع عَلى بلادي

يصفي ع بعدي صوتها مبحوح

اْنْ سهرِت عَليي ليلها تنادي

وبفزع لكاس المرّ بعدك غبّ

اْن رِحتي وْماْ يِصفى لْ حبّنا ذكرى

ونغفى ونوعى وما نلاقي حبّ

ونمشي بمأتم حبنا بكرة

قالت ع قلبي الناس مهما تفوت

وحدك إنتْ ساكن نظر عيني

ولا تفزع ال بينك وبيني يموت

ما زال عايش يا حبيب القلب

حب الوطن ما بينك وبيني.