العصفور

العصفـور

باسم قباني

هدية للدتكور إياد قحوش

شهريـن ع فراش الألم صَرلي

وكل يـوم  بكرة بقول بتطلـّي

بلكي بشمّ الزهر أوعى وطيـب

لكن ما جيـتي وزادت العلـّـة

ودخلِك ليـش بعدك ماْ طلّيتـي

وكانت العـادة لكي مْن شهـور

بالهـاتف رسـالة اْن ما ودّيتي

تودّي إلي رْسالة مع العصفـور

ويطير عصفور بجفن مخجـول

يدقدق بِمنْقـادو على الشبـّاك

ويزقزق بْصوتو الحلو ويقـول:

دخلـَك فتحْلي.. برد  بترجـّاك

وتَ يْضلّ منِّـك يحمل رسـالة

ويبقــو مكـاتيبك إلي يعيشو

بْقلـّو على قلبي إنِت غــالي

وألله لا يحرم طيـر من ريشو

وإغفى أنا وهوِّي بْفَرِد فرشـة

وأوعى ع صوتو بعد غيبـوبي

وإفتح ألو الشبـّاك تَ يمشـي

وإبعت معو رسالة لمحبــوبي

لكن إلك شهريـن يا عصفـور

بليل الأمل مش طـالل عْليـّي

تخمين في عندك جِنِح مكسور

تَ ينجبر كسرَك  تعـا ليـّـي

بس جنحك انت مش مكسـور

وقالو الي صـاير تزور قصور

ونسيت مينو الّلي عطـاك كتير

خلاك تقشع حـالك عْلى ْنسور

لا تفتكر حـالك ذكي يا صغيـر

صرلك ع هالعادة معي مْن شهور

عملتلك  مْن ضلوع قلبي سريـر

ولمـّا شْبِعِت دشّرتني وفلـّـيت

خلّيـتنـي إنده أنا يـا ريــت

لا عْرفتك ولا عْرفت هالعصفـور.