رفـِّة عيـوني

رفـِّة عيـوني

باسم قباني

قالت:

الرفـِّـة زايدة شـْويّة

بعْيونـَك الحلوة

السّحرية

شفلـَك حكيم بْمهنتو

مشهور

بيوصفلك عوينات طبية

صرلك شي أربع خمس ستّ شهور

برفّة قويّة مش طبيعية

لما

بْنظر عينك

حلايي تزور

ما بحب

ينقطِع النظر فيـّي

* * * * *

قلت: أنتي بْتعرفي معذور

وْدخلِك بلا ما تْدقّقي عْليي

الله جبل سحرِك

بِسحر طْيـور

وزهـور غِرقـانة

بْـبَّـرِّيـة

وصورة حلاكي

بْشهْد عم بيفـور

ذابت

بِعَينـيّـي المِسِتْحيـّي

حتى ما تبقى عايشة

بْديجـور

وتتنفّس مْن النور حِرِّيـّـي

بفتّح عيـوني

تا تشوف النّور

بتطمع زيادة بْهيـك

حنّية

وِبْحسّها صارت متل

عصفور

شاف

القفص مفتـوح.. بدّو يطيـر

بْغمّض قبل

ما تطير عينيي.