|
ألقى غدي الرحباني كلمة بالعامية باسم العائلة، أبرز ما جاء فيها:"الى منصور من مروان وغدي وأسامة، أيها النائم انهض، وقم سيضيء لك التاريخ. يا منصور، الحزن غالي والدمع أغلى والملك راح، أغلى منهم وأحلى وأعلى، انت الملك اللي راح، انت الاحلى والاغلى والاعلى، بس يمكن اوطى شوي من الله يللي رايح لعندو اليوم. غنيت وقدمتلو قداسك الالهي بهالكنيسة يلي ربيت فيها.
عاصي وانت صليت وحبيت وفليت، واليوم نايم بغفوتك النهائية، وما بعرف لوين رح بتوديك عالميلي الثانية من الدني او على قلوبنا يللي اشتاقتلك قبل ما تروح او رح تنزرع بأرض لبنان، وذراتك اللامتناهية العطاء بنتشر بهالفضاء الواسع، بتوزع المجد والفرح والجمال للأجيال الآتية حتى تعطينا أمل التغيير والبقاء.
يا سيد الكلمة، شو فينا نقول، وما تركت ولا كلمة حلوة نقولا. أخذت كل الكلام، ذهبت القوافي، رصعت الشعر، انتو الاخوين خلقتو وطن وعملتو ثورة هدرت بالناس وتمردت على حالها وانتصرت، واليوم بعرس الوداع عرس الانتقال الى الرحاب الفضية والشواطىء اللامحدودة، الى الانخطاف الكوني ما رح نبكي، لأنو الكبير ما بيبكو عليه، لكن بيبكو على حالهم. انت عملتنا إنو أولاد الملوك لازم يلجموا عواطفهم حتى ما يتأثر الناس بعواطفهم المرهفة الحزينة، بتخرب المدينة وبتعيش الكآبة والكآبة وحدة قاتلة وموت مؤجل. وانت قلت ما في موت مؤجل، في القيامة والقيامة بقوة الصليب، ما رح نبكيك، رح نغنيك، ونرفع جبينك على راسنا تاج يا ملك متوج على هموم الناس، وعلى أكياس الرمل ودعم الاطفال وريحة المازوت، وملك متوج بقداس كوني ومراسم حرب وجميعها قنابلها سقطت في قلبي.
يا هالبيّ العظيم، يا رجل التواضع والبساطة الاكبر، والتواضع طريق الاستمرارية والخلود، يا صاحب المحبة الكبير والمحبة طريق الوصول لله. يا هالانسان العايش بهالوطن، ويللي عمل الوطن ورفض يمتلك أي شيء من الوطن، لا ارض عندك ولا مال، ولا بيت يتملكو ولا عرزال، ملكت قلوب الناس، وهون العظمة تكون بقلوب ومحبة وخوف كل الناس، هيدي الثورة الحقيقية، وهيك بضج الوطن بالتألق والكبر، كنت ملك الناس من خوفهم على حالهم ان تذهب ويروح معك الوطن المشلع، ما عندك إلا المساكن السعيدة، بيت بجوار الله، هيدا الملك الوحيد، لانك قلت أقوى شيء يلي ما بدو شي، الظاهر يا بيي كلن بدون شي إلا انت.
واليوم بعد 22 سنة من رحيل عاصي، من بعدما افترقتو بالجسد وبقيتو بالروح سوا، رجعتو اتحدتو ورجعتو الاخوين رحباني يلي ارتمو برحم الارض يلي زرعتكم ورجعتكم للتراب.
ومتل ما قلت يا عاصي كل التكريم يللي صار من اجل العطاء منعرفو، وانت بتعرف انو باسم الاخوين انعطى حتى التشييع يلي صار هو تشييع الاخوين، ولما انا بموت مش لازم حدا يكرمني، لاني أخذت مكافأتي، وصار لازم روح بهدوء، ولما راح عاصي قلت خلف هالباب الاسود عم تدفنو اليوم نصف منصور ورح يبقى معي نصف عاصي.
يا منصور العيون الحاقدة والاقلام الصغيرة وأصحاب النفوس السوداء الفاسدة عملت منك شيطان، وحاولوا سلخ الاخوين وسلخ الروح عن الجسد، انتو الاقنوم الواحد، حاولوا تسريح العبيد وتنتيف الوردة من أوراقها، وانت قلت ما تحاولوا تفتشوا بالزهرة من وين بيجي العبير، بيكفي تشموا العطر وتشعروا بالجمال، حاولوا يزوروا التاريخ يشوهوا الحقائق، وحاولوا يخفوا الظل الآخر، لأنو الظل يلي نايم هون كان بالكواليس.
كفيت الرسالة وحدك، ملك متوج بالنبالة، خلقت مسرح جديد، مسرح الاخلاق العالية والصعوبة، استحضرت التاريخ ورسمت الحاضر وتنبأت للمستقبل، ومتل ما كنت عاصي وانت، كتبتو الجمال والخير والحق، كملت مسيرة الحق والخير والجمال، والله جمال وخير وحق. ولهيك منقول اليوم المسيح قام حقا قام لانك وجه الله على الارض(...)
بالمدة الاخيرة من ايامنا سوا، قلت العمر ذل صار لازم فل. أيها العمر الكبير كم انت بائس ومطرز بالاوجاع. رحلت ولكن تركت الأوجاع. كان لازم تروح لانك قلت ايها الموت انت الصاحب الوحيد الذي تبقى معي بعد رحيل عاصي والحبيبة تريز، فالموت يعطي الحياة.
غالب المعلم اما المدرسة فباقية، الرسالة مستمرة والامبراطورية الرحبانية الى ما لا نهاية عبر فيروز وصوتها الآسر وحضورها البهي مع الياس وزياد ومروان وغدي وأسامة وريما وغسان وجاد وكل الاجيال الرحبانية بكامل طوائفها الفنية والوانها المذهبة، علمتونا الصعوبة فصرنا أبناء الصعوبة. تركتنا يا منصور ورحلت والحمل كبير والارث أكبر، يا رب نقدر نحمل هذا الارث وننشره بكل الدنيا شعر وموسيقى.
اليوم سكتت بلابلنا فنغم الشعر والموسيقى في حزن. لقد رحل سيد الشعر والكلمة والمسرح والموسيقى، من أجلك احزن يا منصور يا وجه النحت الفرعوني، مصلوب انت على شطآن العالم كل العالم واليوم كل العالم عم يودعك. انتو اللي خلقتو وطن، وطن الاخوين رحباني، والاخوين راحوا.
يعني يا بيي عم يودعوا الوطن وما عندهم وطن ثاني يخلقوه، قاعدين يعزوا فيك من هالميل وهالميل بيتباوسوا وبيحزنوا كأنن متفقين على كل شيء الا على الوطن، محزونين على شو محزونين؟ الحزن بيجمع، تفضلوا قوموا واعملوا وطن الاخوين رحباني وخلصونا من المصالح وبدلات على قياسكم. انتو متصورين بلد بدون عاصي ومنصور وفيروز؟ حاجي تكذبوا على الناس، اذا مش قادرين تخلقوا وتضبطوا الوطن روحوا فلوا ونحنا منعمل وطن الاخوين رحباني، وطن العدالة والحب والخير والجمال. نحنا اللبنانيين أصحاب الوطن الرحباني، شو يعني الوطن بدون الانسان؟ الانسان أغلى من التراب والمصالح الرخيصة، شو نفع الارض بلا ناس وكل الناس هاجرت منكم، ونحنا اليوم بكنيسة مار الياس يعني بعامية انطلياس سنة 1860 اللي أعادها منصور وجسدها، وبأجمل تجسيد، كلكن مجتمعين من كل الطوائف، تفضلوا قوموا احتفوا على مذبح القديس، واعملوا عامية 2009، لشو الحكي صاحب الحكي راح، وبقي الصوت والامبراطورية مستمرة، قال منصور انتبهوا على الوطن كمان الوطن بيطير، والوطن يا اخوان على إيديكم طار(...)
| 