حـلـم

حـلـم

جولييت بدر

شفتك بِبابي

شْهقت: مو معقـول!!

وَمْضِة فرح

لمْعِة نِدي وهْطـول

كيف وْصِلت ؟

قلبـي نـدَه

بسّ الحكـي مشلـول

غطّ الحمـام

ونـاح بالشّـرفـِة

وتْراكدِت لَتْشـوفك الغـرفِة

والياسمينة الْ عَرّشِت

عَ البـاب

رقصِت فرح

تِكْيِتْ على الدّرفـِة

شو عرَّفك بالبيت

وْأيـّا طريـق مْشيـت

والدّرب

كلـُّـو نـزول ؟؟

مِن فرحْتي وخـوفي

خبّيت وجِّـي

بْـراحْة كفـوفـي

وفْرَكْت عينَيّـي

عالباب مركيّـة

بسمة أمل

من تمَّك المعسـول

تقلي: اشتقت

يانـور عينيّـي

لا تهربـي

باب الحلم مقفـول.