الفراشة والنور

الفراشة والنور

جولييت بدر

لهفة حبّك خَفّفتا

وتاه المشوارْ

والأعذار اللّي خلقتا

مليانة سْرارْ

والعصفورة اللي حبستا

وحدا بالدّارْ

ملّت من حالا ووقتا

وزعلانة كتير

************

الفارس بِبْلادي بدّو

كوم فراشات

وبدّو يبوّق بـِيَدّو

كل الوردات

ولو يقدر يجمع حدّو

تلّة حلوات

ما بيرفض لكن ردّو

بعض التفكيرْ

************

الفْراشِة من طيبتها

بتحبّ النورْ

بتعرف انو بيحرقها

بوَهجو المسحورْ

بسّ الحب بيسرقها

يخليها تْدُور

بحلقة جوّا رقتها

وتنسى التعتيرْ

* * * * * * * *