بكرة أحلى

بكرة أحلى

جولييت بدر

بقلك : أهلا

أهلا وسهلا

شو هالطلة

متل الحورة لْ فوق التلة

دوم بتعلا

حواري الضيعة

بيوت الضيعة

تلالا وسهلا

بْطلعِةْ بدرَك عم تتحلى

قلبي العاشق

متل الباشق

حتى يدوم الحب لْ فيه

ركِع , تعبّد

 صام  وصلى

اللوزة لْ يبسِتْ طِلْعو وْراقا

وحْمَرّو خدود الدّراقة

عرّيشتنا شو مشتاقة

وجْنَيْنِتْنا بَرْعَم فِلا

انت بتعرف شو بْتعنيلي

نظرة عينك

رفّة رمشك

وانت مارق عم توميلي؟

بحسّ الدنيا

عزفِتْ

رقصِتْ

ونْجوم الليل العليانة

عم بتصلي وبتدعيلي

درفة شبّاكي الْ عالحارة

مالت صوبي عم تحكيلي

ليل مبارح

نعستْ نامتْ

فيّقتا بوردة وترتيلة

رح افتحلك قلبي وقلك:

طمّن بالك

روحي خيالك

عم تحلم بالملقى؟ ضَلك

بكرة الملقى بيبقى أحلى