بالبَسْمَلِة

بالبَسْمَلِة..

صبَّح عليَّ وْقالْ

شو هالشّعر ياريْحْة الدرَّاقْ

ياطَعْمِة الدِّرَّاقْ

قَطْفِ الصِّبِحْ

شَهْقِة أَلَقْ .. تِـنْهيدة العشّاق

شَجْرَة عَريْشِة

مْعَرْبَشِة عَ الْحُورْ

وِالْحُور سايِقْ عَ السّما

وْأَكْتَرْ

ما بْتِلِفْتُو حَرْكِة وما

تْمَخْتَر

مِتِل العمر

ما بْيِنْتِظِمْ بالدّور

بالبَسْمَلِة..

كمَّل حديْثُو قال:

.. خلِّيكِ نبْع وْتِدِلْقي

الأشْعارْ

مَيّة نقيّة تْنَبِّت الأزهارْ

تِسِقي الْيَمامِة

تْوَرَّق الأشجارْ

لا تِنْحِني للرّيح مهما تِعِرْكِكْ

شِعْرِكْ صخر

ما بْيِنْتِبِه للنَّـارْ

زْهْر الطّبيعة

يْعَطِّر الأنفاس

كلُّو كَرَم .. ما بْيِنْتِظِرْ آجـارْ

وِالبُلْبُل

يْرَنْدِحْ حَلا عَ النّاس

فوق الغصن والاَّ بْصَحْن الدّار

مِتْل الْبلابل والزّهور

العاطرة

خلّيكي دوم تْرَنْدْحِي

هالخاطرة

وْزيدي غْيوم الحب

تـَ تْشَتِّي الدّني

عطْف وْمحبِّة وسِلمْ كلِّ نهارْ.