موسم العشَّاق

عَمْ تِسأليني بْموسم العِشَّاق

أيَّا هْديّة بْحِبّ تِهْديني

وانْ كان قلبي عَ الوصِلْ تَوّاق

ونار الوجِدْ والشَّوق

تِكْويني

بدّي يا حِلْوِة تْبَرّدي الحرّاق

ومن نبع ريقِكْ دُومْ تِسْقيني

ما عاد بدّي لا ورد وطباق

نفسي شفافك دُومْ ترويني

ما بْريد مِنِّك لا هَجِرْ وِفْراق

ولا ناس تِدْخُلْ بينِك وْبيني

وقضِّي اْوقاتي

بْلَهِفْتي مِشتاق

ناطر ع ضوّ القمر تـَ يْجيني  

قَوْلِكْ يا حِلْوِة هالْعُمُر سبّـاق

والشيب ..

صار اليوم يغزيني!

يللاّ نْقَضِّي هالعُمُر في عْنـاق

وتِبْقي عَ جَنْبِي

وْما تْسِيْبيْني

وكِلْ ما بْعِدْنا قْلُـوبنا تِشْتـاق

ضمِّك لصدْري وْقول دَفّيني

ولما بْيِنْعَس لحْظِك الْبَرّاق

تقولي: تَعَبْني السّهَر

غَـفِّـيْني