نَـبْـرِة صَـدى

ازْرَعْني مِتِلْ شِلِحْ زَنْبَق

مِتِلْ غَيْمِة

مِتِلْ نَسْمِة

مِتِلْ مَوعِدْ عَلَى مَفْرَق

وِلاَّ مِتِلْ نَبْرِةْ صَدَى

وِسْعِ الْمَدَى

تِحْرُس خْيالَكْ كِلّ مَا تِمْرُق

أو مِتِلْ

خَرْزِة بْخَيْط الْمَسْبَحَة بْيَدّكْ

إذا بَدَّكْ

اشْلَحْني عَ بَيْدَرْ ضَيْعِةِ الأحْلامْ

مِتِلْ تَلِّةْ سَنابل قَمْح حِلْيـَانِة

بِالشَّوق

بالإحْساس مِلْيـَانة

بالحُبّ تِنْشُر أجْمَل الأنْغَامْ

وْتِغْفَى عْنـاقيْد الْحَلا عَلَى زِنْدَكْ

إذا بدّك

ازْرَعْنـي بْهيكَل حُبّ بالمِحْرابْ

مِتْلِ الصَّلا

بْقَلْب الْفلا

تْراتيـل تِصْدَح: يِرْجَع الّلي غـابْ

بَعِدْ فِرْقَـة

بَعِدْ حَرْقة

يِتْلمْلَموا الأحْبــــــــاب

وْيِنْطُر حَنيْني, تْفيقْ ويْشِدّك

إذا بَدَّك

اشْبِكْني بْقَميْصَكْ حَلْقِة الْمَحْبُوبْ

تِنْحِني وْتِسجَدْ

وِتْصَلّي تِتْعَبَّد

تْعانِقْ حَلاك, تْرافْقَك عَ دْرُوب

وْتِقْطُفْ رَحيق الْوَرد مِن خَدّك

إذا بدّك

كان الْهَوى بْقَلْبَكْ مِتِلْ طُوفـانْ

شَلاّل عَمْ يِخْدُقْ

يَنْبُوع عَمْ يِدْفُق

وْكانِتْ َمشاعِرْ صادْقَة وْبِرْكانْ

ضاع الهوى

زاد النوى

وبَعْدك ياوَجْد بْتِنْتِظر ألحان ؟

اتركني ..

سْياج الشّوك عَ حدّك

إذا بدّك

Julya-ezak@hotmail.com