طلِّة قمر

شِفْت الْقَمَر سِهْيـان

بعْيونُو حَكي

وِمْغَرْغَرَة بالدَّمِع

قَصْدُو يِشْتِكِي

قِرّبْت صَوْبو..

لِمَّسْت كِتْفُـو هَيْـك

مِتْل الْفَراشي

حَدّ زهْرَة مْلَبـّكي

بْتَعْرِف يا قَمَرْ

يلْ كِلَّكْ سِحِر

لولاك مـاكان الشّعر

لَيْش يارْفيق السَّهر

ِحزنان؟؟

ياريت أعرف يابدر

من شو الحلو زعلان؟

لَيْش الزّعل ياوَهْج

بِعْيون البشرْ

يا حلْم .. ياخَيْمة عِشِق

ياعطر .. يالَون العُمُرْ

لَ تْكُون زُهرة رفيقتك

مالت لَغَيْرَك شي سَحَرْ؟

والا شي غَيْمي مارْقـَة

رشِّت عْليك وْرودْها

بلَّلِتْ تَوْبَك نِدي

بدَّلِتْ نورَك عَتْم

وْحَرْمِتنا السَهَرْ ؟

مليون ؟..شو مليون

أكتر مِنِ مْلايين

وعِدّ أدْ مافينك سنين ؟

شوعْمار! ..شو دْهور!

شو عِشَّاق تِعْبانين

تِكْيُو عَ أحلامُنْ غفُوا

وإنْتْ بِتْرَشْرَشْ حَنين

رَيْت الزّعل ماكان ..

يارْفيق السهر

كنُّو القمر زِعْلان ..

بْيِخْسِفْنا القهر

ماعاد رح  بيطل

عَ بَيادِر الانسان

ويغيييييييب

وْيِتْهَرْهَر عِشِق

عنْ شجرة الأحلام

عنْ زهرة الأنغام ..

عنِ الحيطان

ويبطِّل أمل

وِوْعُود حِلْياني

وِتْغيب بالنِّسْيان

عِشْتار .. ياعِشْتار

يارْفيقْةِ الْعِشّاق

ليل نْهارْ

شوفي الْقَمَر ..

شو مْزَعّلو؟

لَيْش مش مُشْتاق

ليش العتِمْ خَيّم

عَ كِلْ الدّار

وحْياةْ عينَك يابَدِر

مِن كِتِرْ مابْحِبَّك بْقول

لَطَلـِّة حبيب العُمُر :

ياطَلـِّة قمر