كومة عطر

ألله دَلَقْ نِقْطِةْ عِطِرْ

فَتْحِتْ بَراعِمْها زَهِرْ

وِتْناثَرِتْ حَوْلا النُّجومْ

وِتْناغَمِتْ صارِتْ "ضَهِرْ"

قابيل

كِرْمالا قَتَلْ

خَيُّو عَ غَفْلِة وانْقَهَرْ

وْقبرو!

يابيِّي ما اكْبَرُو !!

مَوجُودْ بالضَّيعة القَبِرْ

فيروز

عَ دْرُوبا لَقِتْ

طَيُّونْها وْغَنِّتْ شِعِرْ

حتّى الشَّمِسْ بِكْسُوفْها

ضِحْكِتْ لها

احْمَرِّتْ خَفِرْ

لَمَّا لَمَعْ بَرْق البَرَدْ

مِنْ مَبْسَما

بْبَسْمِةْ ثِغِرْ

مِتِلْ لَيلى ..

مِتِلْ عَبْلَة ..

فيها السِّحِرْ

نُور الْفَجِرْ

عَ تلالْها بْيِغْفَى الْبَدِرْ

وْهِيِّي الْجِسِرْ

وَحْدا الجِسِرْ

ما بين ألله  والبَشَرْ

بِتْحِيْطْها كْرُوم الْجَمال

مْزَهَّرَة وْكِلا فَرَحْ

بْنَيَّات .. بِتْرُوح وْتِجِي

مِتْل الْفَراشات بْمَرَحْ

تِقْطُفْ مِنِ كْرُوم الْحَلا

لَفْتَاتْ مَغْزُولِة بْقُزَحْ

وِكْبَارْها ...

مِتْلِ الدَّهِرْ

عْتَااااااااااااااااقْ

كِلْ واحِدْ سِفِرْ

بِيْخَبّرُو حْكايا الزَّمَنْ

وْكِفْ مَضُّوا أيَّام العِمِرْ

شُو عَذَّبُوهُنْ هالدَّرَكْ

تـَ يْشَارْكُو بْحَرْب السَّفرْ

شُو تْشَنْشَطُوا !!!

شُو تْمَرْمَروا !!!

شُو داقُوا تِنْكيْل وْقَهِرْ !!