باخوس

بودْلير قايِلْ لِلْبَشَرْ:

ضَلُّوا اسْكَرُوا

حِلْوِ السِّكِرْ

والسِّكِرْ مُشْ يَعْني خَمِرْ

يِمْكِن قصيدِةْ حُبّ

تِسْمَعْها ...

شِيْ بِيْتْ

رائِع م ِ الشِّعِرْ

شِيْ سَهْرَهْ حِلْياني بْطَرَبْ

وْتَغْريدْ بُلْبُل لِلفَجِرْ

ضَمِّة وْشَمِّة

لِلْحَبيبْ

هالـْ ريْحْتُو أزْكَى عِطِرْ

شِيْ غَمْرَهْ بِزْنُود العِشِقْ

لَمْسِة وْلَفِّة عَ الخِصِرْ

أوبَوْسِة تِكْيِتْ عَ الِخْدُودْ

وِلاّ شِيْ غَفْوِهْ عَ الصِّدِرْ

يِمْكِنْ شِيْ هَمْسِهْ مْنِ الْوَلَهْ

بِيْقُولا مَحْبُوبِ العِمِرْ

بَسِّ السِّكِرْ

بِيْضَلّ أحْلَى مْنِ السِّحِرْ

بِيْمَتّعَكْ .. بِيْرَيّحَكْ

وِبْتِنْتِشِي بْحِضْنِ السِّحابْ

نَشْوِهْ مِتِلْ مَوْجِ الْبَحِرْ

بْترْبَحْ مَعَا غَفْلِةْ زَمانْ

وْتِعْتِقْ شُعُورَكْ م ِ الأسِرْ

هَيْدا السِّكِرْ

أيَّا شِيْ بَدَّكْ بِيْصِيْر

وِبْأيَّا أمِرْ

باخوسْ

زَرَعْ كَرْمِةْ عِنِبْ

كَبَّرْها جُوّا حْقُولْنا

بارَكْ عَصيْرا وْقالْ:

إنُّو الْعِنِبْ

لَوْن الْفَرَحْ

وِغْنَانِيْ مَلْفُوفِة بْمَرَحْ

تْنَسِّيْنا نِصِّ هْمُومْنا

وَحْدَكْ ياباخوسْ

شُو تْعِبِتْ !!!

وْزِحْتِ الضَّنَا مْنِ دْرُوبْنا

إنْتَ ياباخوسْ

الِزْرَعِتْ

لَونِ الْفَرَح بِعْيُونَّا

رِقَّصِتْنا

سَهَّرْتْنا

عَلَّمِتْنا نْعيشِ الْحَياة

نْدُوق السَّعادِة وِالْهَنا

وْلا لَحْظَة مِنُّو تْفُوتْنا

باخوسْ

إنْتَ اللِّي مُشْ رَحْ تِنْتَسى

وْإنْتَ الْعِمِرْ مِنْ دونْ أسَى

وْأحْلى الْحَلا بِبْيُوتْنا