امسكيني

امْسِكيني

مفيد مسُّوح

لَوَحْدي بـْ هالنّوى

لا تِتْرِكيني

أنا الطّفْل الـْ بِقي قَلْبو

عَجينِة

خميرِتْها الـْ بَنِتْ قانـا

وْصِفيـِتْ

أباً عن جدّ.. وانْحَفْظِت رَهينِة

وْعَ زِنْدِكْ

هالْعَجينِة سْنينْ غِفْيـِتْ

مِتِلْ لَمْحِ البَصَرْ

مَرْقُو سْنيني

كِنِتْ مَبْسوطْ

والنِّجْماتْ بِقْيِـتْ

حَنُونِة

تِنْصَحِك:

لا تِفْطِميني..

احْلمي بْغَفـْـوِه

بْهَنا الأيّام حِليِتْ..

طايِرْ بالسّما وْعَمْ تِلْحَقيني

- الْجَنايِن مِن صِفِر الِوْراق

عِريِتْ؟؟

.. خُيوط الشّمس

للعـِرْيانْ

زينـِـة

بْعَصافير الهوى

الِغصون تِكيـِتْ

تـَ تِحْيي بْزقزقِتها

الرّوح

طينِة

وْطينِةْ بَيتْنا

الدّمعاتْ سِقيـِتْ

جَبينِكْ يلْمَع وْيعْرَقْ جَبيني

القَناطِر عِمْرِت 

العِمْدانْ عِلْيـِتْ

رَبيعْ يْفَرْفِش النّغْمِة الحَزينِة

وإذا شي عاصْفِة

زاروبْ لِقيـِتْ

ع فَسْحِة بَيْتنا تْهزّ السَّفينِة

اتْرِكيها تْهِبّ

مِنْ مَطْرَحْ مَ رِبْيـِتْ

عَساها تْمرّ عاصِفْةِ اللّعينِة

وْعسَانا نْلِمّ

الِقلُوبْ اللّي هِديـِتْ

صَلا للشّمسْ وِمْنِرْجَع ع هينِة

بـِإيدَيّي

البَراعِم نور أحْيـِتْ

مَنازِل تِعْمَر وْتِثْبِتْ يَقيني

وبـِإيدَيْكي

الـْ عَ دَرْبِ الحُبّ شِقيـِتْ

تـَ يبْقى الحُبّ رابِطْتُو

مَتينِة

وإذا السّبعة ورا الخمسين

طِفيـِتْ

شُموع الْماضْيـِة

الضّوِّت مَدينِة

شو همّ العِمْرْ 

وِالقَامِة اللّي حِنْيـِتْ

صِبا الخِتْيار شَخْصِية رَصينِة

وإذا شي يوم هالعِكّاز بِرْيـِتْ

خِدي المَطْمورْ

أوْعَى تِسْتَديني

وْمهما الرّيح

ع الإيام عِتْيـِتْ

بِوجْه الرّيح مِتْل السِّنِدْيانة

امْسكي بالحبّ وبإيدو امْسِكيني.