مختارات من ديوان "كرم الغزل"

يا طير

يا طيرْ واسِي بْصَوتَك المَجْروح      خَفِّف عَذابي وْلا تْزيد جْـروح

مالي حبيب بْهالدِّني.. لا تْروح       غرْقـان لَو كِنت بْسفينِة نُـوح

غاب القمر وِتْشَرَّدوا النِّجْمـات       وما ضل غيرك يا حبيب الروح 

***********************

مـوّالـي

أيـّـام ما بِتْـروح من بـالي       يا تْـراب أرض بْلادْنا الغـالي

وِكْـروم وعْـناقيـد ودوالـي       وِنْجُومْنا فَوق السّمـا تْـلالـي

وْعَ كِلّ نَغْمِةْ وَتَـرْ يا أرْضنا الخَضْرا

                             دَبْكات عِرْس الْفَرَحْ وِالأوفْ مَوَّالـي.

***********************

صيد الحجل

لِمِّنْ شَفِتْني خْدُودْهـا احْمَرِّتْ خَجَلْ      مَرْقِت وْراحِتْ خـايْفِة تِمْشِي بْعَجَلْ

قِلْتِلّهـا يـاحِلُوْتِي صَيْـدِكْ حِلِـي       قَرَّبْتي صَوْبِي وْقَرَّب عْلَيكي الأجَلْ

وِرْمَيت طَلْقَة.. رِجْعِت الطَّلقَة إلي        تارِي الحَجَل بِيْصِيد صَيَّـاد الْحَجَل

تاري الحجل بيصيد صياد الحجل

***********************