فيروز - إلى السيدة فيروز بدون ألقاب

مفيد نبزو *

متل الشمس طلَّيت من بكيرْ

فيَّقتْ كل الناس

ما كان عندي غير حلم زغيرْ

لا في دهب عندي ولا ألماس

هْدَيت الدّني وشو هْدَيتْها

نغمِة فرح حبّيتْها

غنَّيتْها وصلَّيتْها

بْإيمان وبْإحْساس

بْحسِّ الطّبيعة بْتِسْمَعوا

وْبِتْرنْدح بْصَوتا معو

يا ناس ع الأرض ارْجعوا

خلُّوا العقل بالرّاس

يمْكِن الْفَرَّق فرح عَ هالدِّني كلاَّ

علَّق شْموع الأمل من عَتِمْتو وصلَّى

زفَّ الدِّني سرّ القداسة، وبالفرح علاَّ

يمكن حزين وْشِرب مرّ الكاس

مِتْل الشّمس طلِّيتْ

والشّمس إلها غروبْ

يا ريت شو يا ريتْ

عمرا ما إلْها دْروبْ

كنّا قْلوب بْبَيتْ

لا تهربي يا قلوبْ

شو كار لو مرَّيتْ

والبيت ما في ناس

وقنديلنا بْلا زيتْ

وبالسَّقِف كان مْعشَّش سْنونو

واليوم صار مْعَشَّش الوِسْواس

يا بيتنا حنَّيتْ

شوف الحمام مْزيَّن بْراجَك

وْإركَع تَبُوس الْحَجَر بِدْراجَك

الِحْجار يَلِّي مْعَمَّرة بْإيد الزَّمن

وحْياةْ ألله جْبينْها بْيِنْباس

مِتْل الشّمِسْ طلَّيتْ هالطلِّة

وْحبَّيتْ إسْقي بْدَمعتي الفلِّة

وسْألت هاك الرَّوزنة: وَينْ صارت الغلِّة

شَهْقِتْ وْقالِتْ يا زمن يا مْقَطَّع الأنفاس

((تِخْمين راحِتْ حِلْوِة الْحِلوين

وْما ضَلّ في غيري حدا تخمين))

لا شجرة الياسْمين بَعْدا مْوَرَّقة

ولا الزَّنبقة، ولا غصن حبّ الآس.

ضلَّك مْزهَّر فرحْ يا حبّنا لاتروحْ

هالصوت يَلِّي انْجرحْ عطَّر قلب مجروحْ

زْرَعْت المَسا بالحبقْ

سْقيتْ الأملْ بِدْموعْ

قدَّيش شمْع احْترَقْ مابتنطفي يا شْموعْ

بَكِّير زفّ الندى عَ دْروب أحلى دْروب

وْشَحْرور رَفّ وشَدا ينْشُر صَدى الغْروب:

يا حارس الليل خفِّف وحدْتِي وحْشايْ

نار اللّظى أشْعلتْ جوّى القلب وحشاي

يا ليل وين الأنس صار الأنس وحشاي

مالي بْلَيلي سوى نْجوم السّما حرَّاس.

متل الشمس طلَّيت من بكّير فيَّقت كل الناس.