الغيّاب

شو قولَك الغيّاب

رحْ يرْجَعو؟

تِخْمين..

بِتْغيِّرُنْ الِسْنين

بتْبَدِّل الإيام أحوالُنْ

وِبْيِرْجَعو

ما بيشبهو حالُن

بترْسمْهُن بْبالَك

عِطر و قْمار

وْوَرْد يِحْلالَك

وِبْيرجَعُو عَ الدار

يمكن عِطِرْ أغلا

يمكن ورد أحلا

بسّ غير الورد

الـِّ بْبالَك

الـْ بيروح لازم

ما بقى يرجع

غْيابو حدا تاني

بْيِنْحبّ وبْيِكْبَر

ما بْتِقِنْعُو حْدُودُو

مِتْل الخَمِر .. يِنْغَبّ

غْيابو وحي....

أحلا مْن وْجُودو

وْغيّابْنا وْهالعمر

هَدْرِة سيل

لا يْرَجّعُو وْلا انْشَدّ

عَ ديّهُن

عتّقْهُن بْبَالَك

ياعتم الليل ..

يااللّي بيْصِيروا

حِلِمْ ليلِة خمر

تْياب الْحَقيقَة

ضَيّقَة عْليهُن.