مين مِتْلَكْ رَقَّص الأرْواح

(تعليق على قصيدة الدكتور إياد قحوش: هي ضيْعتي)

شو كار هالْجنة

إذا ما كِنْت فيها شاعر حْروف الْمطرْ

بْوصفك إياد تْفَجَّرِتْ كلِّ الصّخور،

وْحنّ ع الميّ الشَّجرْ

لَيش بَدَّكْ يِنْطُق الإنسان،  

وْيِحْكي إذا رَقِّ الحجرْ

مين مِتْلَكْ

لو حِكِي بيْنَعِّس النّجْماتْ

بيْصَحِّي القمرْ

وْمين مِتْلَكْ لو حِكِي عن ضَيْعْتُو

بيْرقَّص الأرواح عَ صوت الْحَنينْ

وْبيْفَرِّح قْلوب الطبيعة وِالبَشرْ

وْمين مِتْلَكْ لو حِكِي عن ضَيْعْتُو

بيْغِلّ بالإحْساس وِبْيِتْرُكْ أَثَرْ

مِنُّو الغِرْبة بْتِنْمِحِي،

وِبْتِنْتِهي، وْبِيْشَقْشِق اللّي هاجَرْ

جْواز السّفرْ.