سيرة حب
ياما على طرقات بيتا تمشوروا
وقديش قدام العيون تبسمروا
وهلق بعد بسنين من عمر العشق
بعدن طريق الحب عم يتذكروا
............
حبقات بابك طول عمرا ماانسقت
إلا بدمع عيون من حبك بكت
ولحاظ عينك بالهوى جرحت قلوب
وألغام صدرك بيْن إيديي تفجروا
............
عشرة أصابع عا طريقك بشْعِلا
شمعات تضوى بالمحبة والحلا
وان كان أوسطهم رح يمس الدهب
بيعرس غيرك عالأكيدة ببترو
............
منتعذب ومندبَق غصون الشجر
تنْصيْد هالعصفور أيام الضجر
ويمكن إذا العصفور عاكتفك وقف
رح يدْبق وما عاد قدرة تطيرو
............
لما أبوكي بسهرتو بيلعب ورق
رح كون قاعد عا حجار المفترق
مْنِ حْموّ شوقي السور رح يولع بنار
وخايف على الحَجْرات تحتي يجمِروا
............
تبقي شْعِليلي الضو عندك مرتين
بعرف أبوكي نام صرلو ساعتين
وجهك على الشباك بالعتمة ضوى
بدر وعلى الشباك ألله مصوّرو
............
نظرات عينك بالشتي بتشلح دفا
ووردات حلوة مِن خدودك بقطفا
وكروم ثغرك بِتِشرين بْتِستوي
ونبيذ أحمر مِنِ شْفافك بعصرو.
سوريا