نظرات القيامة

نظرات القيامة

طوني شلهوب

أوقاتْ ببكي،

ومِن بَعد ما موتْ

بِغلقْ عَـ حالي، دَرْفِة التَّابوت

وكِلـْما الدَّرفِة، تنطوي، تا تِنغَلقْ

بْشوفْ الوَرَقْ ، عَم ينطوي،

فوْقْ الوَرَقْ...

وْفي حَرف، جَنبي بالنَّعْش، مَزتوت

عَم يُصْرخ لْخَيُّو، وْصَوْتو

سْكوت...

وخيُّو، عَلى صَوتو اشتلق!

بيرُوحْ، حالو بالنَّعش يِرْمي

بْيـِتْكي عَ خيُّو،

بْيِعْلقو مِتل الحَلَق

وبِيموتْ كِل ما يشوف خيُّو مات

ومَطرحْ الـْ ماتو، بقفوة العَتمِة

شِي كَمّ كِلمة تِنْخلق

وتمُوتْ لمَّا تِخلقْ الكِلمِة...

ومَيِّتْ أنا والحَرف والكِلمات

وْعَـ السَّطر، ما في

لا نَبَضْ، لا صَوْت

ننطرْ عْلينا، تِهتِدي،

نظرات...

تْهزّنا،

وتقيمنا من المَوْت...