طيـّارة ورق من أطفال لبنان الى أطفال اسرائيل (في ذكرى حرب تموز): وصلت الرسالة
طيـّارة ورق
من أطفال لبنان الى أطفال اسرائيل (في ذكرى حرب تموز): وصلت الرسالة
****
د. إياد قحوش
عالسّطح كنّا
"وبيتنا" السّقفو حديد
كان حضْن
وإيد عم بتشدّ إيد
وكنّا زغار
وعم يبلّلنا العرق
ونحنا وطيّارة ورق نركد ركيد
**
وفجأه
السّما احمرّت .. و موقدها برق
و رجّو التّلال قبالنا
وضجّ الرّعيد
وكيْف رح بيقدر طفل طيّارة ورق
وحدو
يلاقي وحش طيّارة حديد ؟
**
كان الجمر
كلّ ما على مطرح مرق
يمحي الحياة
وياخد الدِّحكه بعيد
وطاف الفزع
والبيت عل فيه احترق
وانهدّت الحيطان .. عالبيت السعيد
وحلْم الطفل من تحت المخدّه انسرق
وطارت بدل طيّارتو طيور النّهيد
**
"و بكيوا الملوك"
وبعد ماالدّم انهرق
انفلّ الحديد
بِ حزم الجْنوبي الوحيد
وطلعت زهور النّوم
بْشقوق الأرق
وجهجه ضمير الصّمت
بالصّوت العنيد
ولمّا صباح جديد عالمطرح شرق
ماضلّ إلاّ خيط طيّاره ورق
حامل علم لبنان
لبنان الشّهيد
**
من أطفال في إسرائيل إلى أطفال لبنان