نعش إيريس على رجاء القيامة

نعش إيريس

على رجاء القيامة

د. إياد قحوش

نامي

سْريرك نهر

بتهزّ تحتو المي تتنامي

ومْخدّتك موجِه

وْ وجّك

خْيال القمر .. بالمي قدّامي

وشعرك زهر نامي

**

وْ شو ضلّ لبكرا

ومْبارح حْرامي

**

نامي

بْعيوني شْرود

جرحك وتر مشدود

عاقوس أيامي

نامي

تغطّي مليح

شـدّي لْحاف الموت

وكيفْ مـا تْهبّ الرّيح

بـدّو يْروح الصّوت

**

وْ صوتك جرح حامي

**

إيريس

ليكي قبل

بالنّهر ماتنامي

لمّي الغيوم البيض، هودي دْفاتْرك

خوفي

يْطوف الحزن

من خاطرك

طوفه

و يْغرّققلامي

**

بالفصح ياإيريس

الموت وحدو بيكسر صْيامي

**

نامي

العمر مرقه

نامي

احْبسي الايام .. بجْنينْة جْفونك

نامي ولايهمّك

حتى اذا ورقه

مْن الورد .. وِقْعِت هيك عاتمّك

لاتزعلي .. وْلا تْفتّحي عيونك

هيدا ملاك الشعر

رفّ .. و وقع منّو

ريشةْ جنِح دامي 

تاتكتبي عالغيب أحلامي

**

نامي

سْهرتي كْتير

حْكيتي لْنا حكايات

عن عمرك الرايح

وعن عمرك الجايي

وهلق فتَحتي البير

وصرتي بالحكايي

يمكن مَ ضلّ كْتير

تتقوم القْيامه

**

إيريس .. نامي شْويّ

جايي الصبح .. نامي

******

أنحني أمام نعشك ياإيريس، وأقبل اليد التي كتبت آيات الشعر الخالد.

وليكن ذكرك مؤبداً

خيك اياد قحوش