نيـّالـْكُن!!

نيـّالـْكُن!!

مفيد مسُّوح

مهداة إلى جميع أحبائي فنانيّ "التعبير بالتعليق"..

القيمَة القيِّمة المضافة التي تزيدني سعادة وفخراً

نيـّالْكُن

مو حَسَد بالقلب

لا واللـَــه

وَلا بالعيـن ضـاقِت رهجة الزّهرات

جـوّا القلب فرحـة

وْفوق السـّما علاّ

رسـّام

تارِك مرسمو

وْمسحور باللوحات

وْدمعة بِعينو تْحرحرو

لمّا وقف صَلاّ

زعلان: ليش بتِسبقو عَ العرس هاللحظات؟؟!

بيغصّ كلْ ما بْتِغمِزو

زهرة

استوى ظِلاّ

بْيطْلع ع بالو

يرتِكي

ببْرود هالفيـّات

يْغازل

(متِل غيرو) !!

الحــلا

الّلي بالحلا اتْحلاّ

وْقدّام عينو

غِنِـج ياسمين

بالكمشات

غناني وْحكي..

وْضحك وسّهر..

وِقْداح تِتْمـَلاّ

وْعَ زهور بلّلها النّدي

يتسابقو النّحلات

مرّة لـْ رحيق العسل

مرّات تِتسلاّ

وناطور واقف خَجَلْ

عمْ يزفر النّهدات

خايِف شي نحلِة تِقِرْصو

لو حبّ يوصلاّ

بْحيث الكرم عيلة وَفا

دْساتيرها آيات

عْليها حلَف

شو بْتِطلُب الإيّام

يِتْوَلاّ

ما بْيِقدُر النّاطور

يالّلي سحرِتو اللفتات

ينسى بِسِحرا الكرم..

ويغافلو شي ديب!!

يْسوِّد بياض سْوارتو

هالـْ بالوفا اتْجلاّ.