الزمان خيال

الزمان خيال

نجدي حاطوم

حطو على الريح السّرج

بيت الشعر خيال

وقف على باب البحر

كان الهوى ميّال

نادى أبو الطيّب نادى أبو تمام

نادى صبايا حلب ردو صبايا الشام

 ورد الصدى صوت الحكي

ونعِس الصّدى وصوت الشعر ما نام

مدّو على جرح النفس

المشقوق مثل النهر

ايد الفرح

صاح الوجع تعبان

ممدود صرلي عمر من صفين

وصل الندم لبنان

وما صدقو

 ما صدقو

شدو على الشوق ومشو

وصلو بلاد النخل كان النخل خجلان

شافو طفل أول عجي زاحف من الصحرا

وجهو الشمال

شافو قبائل راحلة

شافو سهول مجرحة

شافو جبال

شافو سيوف مشرعة

 ومزركشة

وما صدقو ان الزمان خيال