زهور السّنديان

زهور السّنديان

مفيد مسَّوح

هذه المتواضعة مهداة إلى

الشاعر الدكتور محمود خليل إسماعيل

بمناسبة قصيدته "من ذاكرة الضّيعة"

بْتَعرف؟؟

إنِت مش بسّ شاعر

أو إنِت دَكْتـُور

وْمش بسّ نحـّات الحجر

وِتْطوِّع البلّـور

أو بسّ رسـّام وْوِقِف

عَ ضفاف أقوى نْهور

يْلوِّن بِصابيعو الدّني

تحلى الدّني وتثـور

أو إنت صايغ للدّهب

والدّهب طارة نور

أو للعَمار مْعلّم

يْحَصِّن قْلاعُو بْسور

أو للبيادر والجنا

حارس وفي..

أو للكرم ناطور،

إنت السّيـاحة بيّـها

مْنِ جبالْها للغور

ومْن الشّمال تْمشّطو

بْشمس الجَنوب

والشّرق ميدانو المدى

تهدُر بِغرْبو بْحور

ناسك إنت..

بْتِبْلش صَلاتو بالغزل

يِختُم بها الِسْحور

مْزامير داوود النبي

ألـّف لها مزمور

تعبق بألحانو الدّني

ويطيّبو البخّور

إنتَ، يا محمود، الحلا

منـّو إلّك مندور

بْحيثَك إله لـْ كلّ ما ذْكرتو

وطـاير متل شحرور

يْغرّد بِساحات الدّني

تِهنا الدّني وتْدّور

وتصير بسمات الهنا

للسّندْيان زْهور.