من ذاكرة الضيعة.....

من ذاكرة الضيعة.....

الدكتور محمود إسماعيل خليل

ضيعـةْ على سفـح الْجبـلْ

والْجردْ..

إلهــا ســــورْ

الصّفصاف عالنـّبعة تـِكي

والدّلب والزّعـــــرورْ

حيطانـها زْنـود السّـمر

وسياجــها المنـــتورْ

(المعرجلينة) عَ السّـطح

وسْطــوحهـا بلـّـورْ

ورمـّـان متدّلي بسقـف

و( طِشْت الكشك)

بِ (مْكَبـّتــو) مكمـورْ

و(الخابية ) الـْ حــدّ الــــدّرج

(سقــروقها) نــاطورْ

وسـْـراج فوق(الخالْيـــــة) عالكــاز

(فـْتيـــلة)

تبـــدّل عتمنــا بالنـّــورْ

و(قـِفـِّةْ) زْبيب وْتين بــ (قـْلايــــد)

و(مَلْبَنْ)

عَ بعضو مْرتـّب و مســـطورْ

و( نقـّـال) مع (قصْـعة) و (طَبـّوقــَـة)

(جمـيـّم)عنب والتين والعجـّورْ

و(خَضـَّة)

و(شْنينِة)

وْبرغُل المجــروش

و(المَرِغْفِة)

و(الدّسـْـت) وْ(لـَكـَنْ) معقــورْ

و( جــرن الحجر) وِ(مْدَقـّتـُو) حــدّو

دقـّت (الدّقة) عَمّـتـك بحــّـورْ

طبخِـت لـ(هالعِـجـّان) قمـــحيــة

دقّ (الخـَشـُوقـَة)

باللــكن محـــصورْ

(دبْس)

و(طبيــخ) وحـدّهُن (كســرة) خبــــز

و(مـْجدّرة)

وفحـْل البَصَـل بيـإيــدها

مكســـــورْ

و (شلــّوف ) جـــوا (القنّ)

نـــاطر مدبحــــــو

للصـّالحـين الأولـِيـــا

مـــنــدورْ

و(شـَلْعِـة) وْلاد وْنـاطـرين بْشــَــوق

سِتــّي الحنونة وْعَجْنـِة التــّنــّـورْ

و(شـَـدّوق ) خبـْـز مْحمـّر و(بحبـوح)

مع (شنكليش) وْبَصَـل أحلى فطــــورْ

زبـدة وْقريـشة

قبــالْـهُـن (طــاسة) لبَـن

بْتسوى الــدّني

وفيها الســّبع بـْـحــورْ

وْ وَرْدِة عَ هــاك(الموقــَـدِة) تِنـْـده

ليكي يا ســـعدة

(الدّســــت) عمْ بيـْـفورْ

وْديك الحَبَـش و البطّ و(الجيــجــات)

وْ(رزّة)

وْحبـِل مـَرْبـوط بالســـّـاعورْ

ضاعت (القرقة) والتقـوا الصـّيـصــان

و( شفّ) الحمام

مْخــــرّب وْمهــــجورْ

و(الجابية) بالميّ مليــــانـة

الغنْمِة على (المعلف)

و (التـِّك) و ( القـَـرْقــور)

و(منخل) مْعلـّق جنب منـّو (شـْــوال)

فردِة (حَجَر طاحـون)

عليها مصــّع العصفــــــورْ

و(النّير) جنْبو (الصــّمد) و(الكـِــدّان)

و(الشّــحر) حــدّو

مْـخَـلـّع وْمكســـورْ

و(شـْكــارة) الحنطـة على البيـــدر

الْغـَلـّة وفيرة والقلب مســـرورْ

و(حيلان) عم يدرُس عدِس وشْعيــــر

و(مــورج) وراه

مْعـلـّق و مـَجـــرورْ

و(مسْرد) و(صانوت) ..

و(مدراي) مع (شوكــــة)

(دريــخة) و(قــاطع) والمهر ميــْـدورْ

و زرّوف على البيدر بإيدها (غربـــــال)

(شـِنْبـُل وْمسْحـِةْ قمح)

غَلـّة إبن خضـّـــورْ

راحـوا الصــّبايـا بْهالمسا (يْتـَلــّـوا)

(راوي) و( دلــــو)

عا ضـهر هالكرْكـــورْ

(الجبّ) الْعـ َمجْرى السـّـاقية نشــّــف

راحــوا النــّبــع

لاقـوا النـّبـع محـرورْ

شــافوا بديعــــة عالنـّـهر تغســل

(مخبـاط) و(شنـان مشّيح) ومصـْـــرورْ

بيإيـْدْها (قنبــاز) مع(شــروال)

و(العصبـــــــة)

و(شال) ومَعُو(الحطـّة)

و(منديلها) معصـــورْ

هيدي حْكاية ضيعتي الحلـــــوة

صيتا الجــمال بْهالـدّني مذكـورْ

تفضــّل ع َهالضـّيعة و إذا وصـّلـــت

خْلاع النـّعـل إنتَ ِبأرض الطــّـــــورْ

هَيْدي القصيدة خطّها محــــمود

ابن الخــــليل

وْصـــنِعْـتـو دكتـــــورْ

نْهار السـّبت ما مـرّ غيــر تْنيــــن

بْسادس شهــــر من بين أحلى شهـــورْ

يـَـلـّــي بـْينقلها بـْأمانة ينســِــــبا

الطــّفل (القصــــيدة)

بْعيـْلـتــو مـَشـْـهـــــورْ.