عطر الوقتْ....!

ما بين

سجّادة صلا

عـ َجبينها

و نبضْ العروق.....

بْينزاح

محراب العشق

 حرفَين

بِدَفتر طفل

غِفْيان ...

من قبْل الدّني ما تْفوق....

و شْفافْها

عطر الوقت

ضايع ماْ بَين سْطور

تِمْحي...

وْتِمْحي جَوعْة الكِلْمات

اْللّي دَبـّلوا

مِن رَهْجِة الْكِلْمات

وِتْرِدّ شمس العمر

بـِ إيدها.... لشْروق.....

طالِع عـَ بالي

إرسْمِك بالضــّو

وْخايف تـَ إنسى

لَون حبــّاتو...!

بريشة كنار

تعتـّقت بالنور

وْقوس القزح

ساكن بـِ ريشاتو

وْعم تسأليني ..!

كيف شِكْل بْكون..؟

وْقلـّك :

مِتِل غِمْر القمح

بْوَهْج الشمس محروق....!

وْ طالع عـَ بالي

رِشّ عـَ جْفونِك

غفا تتنام ..

وْ يِبْقى القمر

بِرْدايتِك وِالليل

يِبْقى حْرام

وِ تْلِفّ خصرِك

غابْة الزّيتون

وْأنطر أنا

موسم.... متل مجنون

نتـّف زَهر رِمّان

وْإسْرُق زهر ليمون..

وْضِمـِّك

مِتِل ما ضَمّ

خيط الصـّبح

قدّك المَمشوق.....

وْ جايي عـَ بالي

نِسْرُق جْنَينِة حِلِم

إنتِ وْ أنا

و نْضيع لَيْليي

و بْتِسأليني: وَين بدنا نْروح

عتْمِة الدّني

وبْيوت مِنْسِيـّة

وْحِطّك ما بين جْوانحي

و نْطير...

وْ إبْقى أنا العاشق

وتبقى إنتْ معشوق....