قصيدة الشاعر المنبري الفنان حسان بسطاطي في احتفاليات دمشق عاصمة للثقافة وهج الياسمين الدمشقي

ياشــام يامرايــات أحـلامي        خيّـم عَ زهـرك نحـل إلهـامي

وْمِن كِتِر ماجـوعك  إلي مشتاق       صـار العسل يدلـق من كْمـامي

ياشـام  يامرجـوحـة الآفـاق        شمسك بْتـوعى  والزمن غـامي

بْيغفى على حضنك جبل عمـلاق        لفّ الأبـد عَ جبهتـو عْمـامـي

بحبّـك وْمن يومِ الْحنيني فـاق        بْدِيتي عَ زنـْد العـاطفي تْنـامي

وبقيو إلك قلبي وروحي  رفـاق        وْقطّـب حَنـاني  جرحك الـدّامي

بحبّك ولو هالكـون فيّي ضـاق        وْبِمشي حفـا  عَ جمْرك الحـامي

بحبّك ولو صارو سْنيني عْتـاق        ولـو عرّشـو بالـروح  آلامـي

حبّك سرق قلبـي مْن الأعمـاق        وسحرك سرق حبري من قْلامـي

وأكتر مِنِ حْـرامي النظر سرّاق        لمّـا حْرامي بْيسرق حرامـــي

شـو لذّة الّلهفي بدون عْـنـاق        شـو لذّة الميّـي بـَلا الظـّامي؟

وشو الحبّ لوما شفّـتين رقـاق              يدبغ عَ خـدّي تـوتْها الشّـامي

فلفش بِهالغـوطة الربيـع وْراق       إيـدْ تِمْـحي.. إيـد رسّــامي

وغْـروب شمسِك  قمّـر السمّاق              ودَمَّــر الهـامي  بْدُمّر الهامي

وصْخـور معلـولا مْن الأشـواق      بيحكـو مع التّـاريـخ آرامـي

ويشهق نهر بَرَدى بْلـُقى العشّاق      وْبيـودّعُـن في مشهد دْرامـي

وحْيـاة آخـر نظرتيـن غمـاق       لْمِنْهُن سْريـري  وْمنْهُن حْرامي

ياشـام  وحيـاة الوحي الخـلاّق      صار الزمن كرمـال عينِك  خَـدّ

وصرتي على خدِّ الزّمن شامـي

منّـي إلِـك ياشـام عيـديّــي       وردةْ عِشِـق حمْـرا نْبيديّــي

عطرهـا  بالعمـر ما بيشيــخ       أعتـق من العملي الرشيديّــي

لفتـاتْـهـا بتْـغـازل المرّيـخ       وْغمزاتها  طْـوابـع بريديّــي

بْورقـاتها بْيتـْشمّس التـّاريـخ       عَ مصطبة  ســوق الحميديّـي

ياشـام عطرك مِن عبير الصيـف      مْن الياسمين لْعَ المدى تْعَمْـشَق

جايي الوحي عَ قاسيـونك ضيـف      استـقبليـه  بقـدّك الأمشــق

خْيوط الشمس عّ الندي ترسم طيف     ملوّن  يغـازل خصرك الأرشـق

والسّيف مابْيعرف شو مجد السّيف      "الاّ إزا مَاْ بْإيــدك تـْدّمشـَق"

قدّيـش فيـكي تعتّقـو الأيّــام              وْكلْس العَـراقا  صار فيكي رْخام

وْياما نَحَتْ تاصـارت بْسـاتيـن              بْأرضـِك إبن "عبد الملك هشـام"

ولوعاد عَ دربك  "أبن سيريــن"       عَ بـابِكِ الشّرقـي بْيِحْني الهـام

وكلْ مانْحَرَجْ بالفكر "محيي الدين"             بتْجـاوْبي عنّو يا بصرى الشّـام

ياشــام  جـايبلك شِعر شفّـاف      قومي اسْمعي مِن وحْيك وْنَظمـي

قْبـالِك جبـل حيّـك الغيم لحـاف      وعَ جْرَيه خلقت تركـع العَظمـي

روحو سألو "غورو" لْحياتو عـاف     بيــردّ عنـّو هيكلـو العَظمـي

وبيقـول بعـدو بالقبـر بيخـاف      من "ميسلون " و "يوسف العَظمي"

قدّيـش فيـكي "عقل" عقلـو طار      وبعدهـا عقـولِـك مْخاصِـمتـو

وبالرّغم مافيكـي سكت "نــزار"      عم يسكت النّــارنج من صمتـو

و"فيــروز" لوما تْروحن الأشعار      كنتـو عن شْفـاف الحلا صمتـو

وْلا الأوبّـرا دولة ثقـافي صـار       وْلا الشّــام  رح بتكون عاصمتو

ياريت  يرجع عـزّنـا السّـوري       وْ"سلطـان باشا" و"قانصو الغوري"

ومن بعد ماتغيّـم تْشَتـّي رجـال      عَ قصـر شعب وقصر جمهـوري

لـولا ماجبلـك  من بـلاد الغـال      مشلح صبـاكي "فـارس الخوري"

ما لْبِسْـتـي تَـوب إستـقــلال      وْلا يــاسْمينك عانَـق الجـوري

وْمِـن قبـل ماتِلِبْسي البـــزّي      ياشـام  قـومي بْإختـك اعتـزّي

كترت مَاْ فيهـا دم صـافي انصبّ      "البحر أحمـر" صـار من غـزّي

ياشــام غيرك ما سحرنـي ربّ       ترابـك إلهي وكعبتـي "المـزّي"

من هيـك مـا بقبـل بعد ينغـبّ      كـاسي الحلو وكاسـاتك المـزّي

المجـد الكـرامي العـز تاينْطال       صوبك طلـع  درجي ورى درجي

وْتَيشيل من شالك شيْ وَبْرةْ شال       وْتَ يْمـدّ إيــدو  ما بْيستـرجي

لْبيرصّـع التّاريـخ عنِّـك قـال        الصّايغ لْقَضّـى العمر جُوهرْجـي

بالأمس كنتي "مرجـة الأبطـال"        وِاليـوم صرتـي "ساحْة المرجي"

قالت الشّـام اليـوم مدري أمس       مدري قبل أمس التقـى فيّــي

بدْر الليـالي لّي بْيهمس همْـس        بحكــايـْة الحبّ  الخرافـيّـي

بوَّس البردايــي  ولمسها لمس              تـا داخ مِن خمـر الشّفـافيّـي

وْلوما ركع حدّي وْهَداني الشمس              مـاصرْت  عـاصمتـو الثقافيّي

حسّـــــان بســـــطاطي

قاعة المحاضرات ـ المركز الثقافي العربي

دمشق ـ كفر سوسة ـ مقابل مخفر الشرطة