الأعمى

حَيط السِّجِن عالــي

وْشَمْسو مْطَمّشي

وْعِکّـازْتو

بْعَتْمِة سْنينُو البَقْبَشِي

والدّرْب لا رايـِح

وَلا راجـِع مَعُو

بْيـِمْـشيـه

كِلْ ما الدّرِبْ

مع حالو مِشِي

عَيْنو قبر

 النّور لمّا بْيِقْشَعُوا

بْيُوقــاعْ

رَبْطَه مْنِ الِحْبـال مْقَطّشي

مِتْل الصّمِتْ

لمّا بِإبْرِه بْتِفْقَعُو

بيْصير أخْرَس

بالهَمِسْ مابْيِرْتِشي

وْبيضَلّ صافِنْ ..

صَفِنْتُو مابْتِنْفَعُو

وْصَفْحِة شْرودُو

بالضّيــاع مْنَمّشي

مِتْل الغريب

بْتاخْدُو وْبِتْرَجّعُو

مْراجيــح

بَين الدّعْتَرَه وِالْفَرْكَشِي

*******