كِنّّا أنا وْإنتِ سوَى

كِنّّا أنا وْإنتِ سوَى

نِلْعَبْ حَكِي

نِرْسُمْ صُوَرْ

نِخْزُق صُوَرْ

نْخَرْبِشْ عَ حيطان الدّهرْ

يِطْلَعْ شِعِرْ..

كِنّا إذا شِفْنا الوَجَع نِحْكِي مَعُو

تـَ نْقَلّعُو مِنْ مَطْرَحُو

وْنِزْرَعْ وَرِدْ

يْعَرْبِشْ عَ شبّاك الحِلِمْ

ضِحْكِة وْعِطِرْ...

كِنّا إذا شِفْنا الظِّلِمْ

نِمْزَحْ مَعُو

وِاْنْ ما فِهِمْ

مِنْكَسّرو

وِمْنَعِمْلُو مِثْل الْقَصَبْ

نايات

تـَ نْشُوف كل الناس عمّا تِعِزْفُو ...

وْلَمّا الحِزِنْ  

يِفْتَحْ جِرِحْ

مِنْقَصْقِص غْيُوم السّما

تـَ نْلَفِلْفُو

وِاْنْ ما كَتَمْ

نِنْصُب خْيام الْفَرَح قَوْس وْقَزَحْ

لَنْطَيّبُو ...  

كِنّا إذا شِفْنَا الْقَمَر

نْدِقّ الْكِحِل وِنْكَحّلُو

نْقِلُّو غَزَلْ

تـَ نَّزّلُو

شَعْرِكْ سَبَّل خْيوط الضّو

وِطْلُوع الصّبِح

وجْهِك رْفوف الحَجَل

تِمْرَح عَلَى سَفْح الجَبَل

عْيونِك حِرِزْ

مْعَلّق عَلَى كِتْف الطّفِلْ

صدْرِك سْهُول الْواسْعَة

وْحَطّ الحمام

وْما خِجِلْ

خِصْرِكْ نَخِلْ

مْفَيِّيْ عَلَى باب العُمُرْ

تَمْرُو ...

حُلُوْ ..

مِثل القَصيدِةْ

الْعاشْقَة بَيْت الشِّعِر.