نـول الزّمـن

لا تِفْتَحي فْناجين مَقْلُـوبي 
وْلا تْبَحِبْشـي بالْكَفّ 
مـافي سِرّْ
هِيِّي الدّنـي بْهالْكَون كَبْكُـوبي
بْتِنْلَفّ
عاكُوع الْوقت .. وِالْوَقْت عَمْ بِيْـكِرّْ
***

شايفْ أنا صابيـع
صابيع عمْبِتْشِدّ ..
وْصابيـع بِتْرَخِّـي

وِشْفـافْ بِتَّمْتِمْ حَكي وْبِتْعِدّ

وِبْتِلْعَب بْأقْدارْنـا
وْبِتْخَرْبِط بْعَدَّا

وْأعْمارْنا .. بِتْمِدّ .. ما بِتْمِدّ
شو أعمارنا!
خِيْطان عانُوْل الزّمن
لابْتَعِرْفي

مِنْ وَين هِيِّي مْبَلّشِي ..
وْلا وَيْن هِيِّي رايْحَه .. وْمِنْضيْع

مابيْن هالصّابيـع

***

مافي حَدا بِيْضَلّ

وْمافي حَدا بِيْرُوح

سامِعْ صَدى مَبْحُـوح

مابيْن حَيْط وْحَيْط

يِمْكِن حَنين الرُّوح

عَلَّقْ بِراسِ التَّلّ

وِتْعَلَّقْ

وْبالأرض نَسَّلْ خَيْط  

يِمْكِن حدا هلّقْ
مات .. وْمحي حالو
وْيِمْكِن مِنِ خْيـالو
يِمْكِن حدا هَوْنيك .. بالبرد عَمْ يِِخْلَقْ