رثــاء

كِلْشي إلُو بْدَايِي .. إلُو نْهَايِي

 هالأرض رِحْلِه .. والسَّما غايِي

وْنِحْنا .. كلام عْلَى سُطُور الرِّيح

بْدَفْتَر دِنِي .. وِالْمَوتْ مِحَّايِي

مْنِقْطَع .. مِنِ مْرَاجيْح لِمْرَاجيْح

شِي جايْبِتْنا... وْشِي مْوِدَّايِي

مْنِمْشِي الْعُمِرْ.. مابين زِيْح وْزِيح

نِرْكُد نْلاقي مَوْتْنا الْجَايِي

الإنسان لِ بْيَعْطِي بْيِبْقَى مْلِيْح

 اسمو.. متل شجره مدلايي

بِيْصير ذِكْرُو.. بْهَالدّنِي مْصَابيح

تْضَّوِّي الطّريق .. وْسِيْرْتُو آيِي

يارايْحَه.. وْصَمْتِكْ صِفِي تِلْمِيْح

بْلَون الْحَقيقَه هالِمْخَبَّايِي
لَوَّنْ شَبابِكْ حِلِمْنا تْلاويْح

وْصِرْنا نْحِبّ النَّوم بِكْوانين

تا نِقْشَعِك بِمْنَامْنا حْكَايِي