حْكاية السّنْدوق

سَنْدُوق سِتِّي الْخَشَبْ

الْبَعْدُو بِالِخْزانِه

وْمِن هالطَّرَف مَحْروقْ

وْمِن هالطَّرَف مَحْلُـول

وْبِيْزَقْزِق غْناني

قِضَّيْت عمْري قول

شـو فيه هَالسّنْدوق؟!

* ** ** *

وْهَلَّق أنا وْهُوِّي

تْنَيْاتْنا هَوْنيْك

وْبِتْشِدّني قُوِّه

تاإفْتَحُو

شو؟ بِفْتَحُو وِبْشُوف .. شوفيه .. شومافيه!!

ياربّ شو بْسَوِّي

قَلْبي صِفِي مَحْروق

شو فيه هالسّندوق؟!
* ** ** *

سَنْدوق سِتِّي الخَشَب

نِصّ الدّهب بالسُّوق

ياربّ سامِحْني .. رح إفْتَح السّندوق

* ** ** *

سِكَّرْت باب الدّار
وِبْعَتِمْ بِرْدايـِي

مَدَّيْت إيدي هَيْك .. وِفْتَحْتُو

وْمالْقِيْت إلا .. شَقْفِة مْرايـِي

طِلَّعْتْ فيها وْشِفْتْ

سِتِّي .. وْبِوِجَّا شْقُوق

ضِحْكِتْ وْقـالِتْلي

هَي آخر حْكـايِي