خيـَّـال.. إلى سعيد عقل

كَوْكَبْ

مَرَقْ مِنْ حَدّ مِنُّـو

وْضـــاع..

وِالْلَّيـل نَفَّسْ

ضَلّ مِنُّو دْراعْ

وْ فَوْقُـو ارْتَكـى..

وْوَحْدا الشّمِسْ

بِقْيِتْ قْبــالُو بالسّمَـا

وْ بِتْدُّور دَوْرَه بْهَالدِّنـي

كِلْمـا حَكَى
وْ زَهَّـر زَمـان مْشـاعْ

***

الضَّو
قَصْقَصْلُو الحْرُوف

وْزَتّهـا بْحِضْنُو..

بــاقِـة وَرِدْ

طَقْطَسْ نِدِي فيها الْجَمِرْ

وِالْوَقِتْ عَمْ يِغْلِي

وْصَدم جُوع الْبَرِدْ

تـاداخ عَاكِبَّايْتـُو

كَبْعِة خَمِرْ

وِبْيِشْرَب وْبيزيد

وْبِتْشِبّ نـار حكـايْتُو

وْبِتْشَوبِر عْنـاقيدْ

تـَ يْطُول نهْر الْعُمِرْ

****

فَيْلَتْ فَرَسْ

للشّعِرْ..

بِجْنُون الْجَمـال

ضَجّ الْحَكِـي

مِنْ شَبِحْتُـو

وْ طَقّ الخيال
وصار الوقت

بعد وقبل..

يِمْشي مَعُـو .. وْيِنْقـال
الْحَوَّشْ سَمَا

وْحَطَّا بْسَهِل البْقـاع

وْ "زَحْلَن" الكِلْمِه بـْ"شـال"

عَجَن الصّخِر مِنْ هَيْبْتُـو

وْعَرَّمْ مِتِلْ خِيَّـال

وْزَتُّـو .. وحي .. وَقَّفْ إلُـو تِمْثـالْ