شو هالعرب

ألله مِتِلْ كِلِّ الْبَشَرْ

مِحْتـارْ

شُو بْيَعمِلِ بْشَعْبِ الْعَرَبْ

حَطُّن بْنِصِّ الأرْض

خَلاَّهُنْ كْتـارْ

جَنُّوا .. وْما بَعْرِفْ كيف

في مِنْهُنْ هَرَبْ

وْمِنْهُنْ سَرَقْ .. مِنْهُنْ ضَرَبْ

مِنْهُنْ عَ بَعْضُنْ بَلَّشُوا بالزَّعْبَرَه

وْمِنْهُنْ قَتَلْ خَيُّـو

وْمِنْهُنْ عَ أَخْد التَّـارْ

بَعْد بْيِحِلْفُوا

وْعَالْمَقْبَرَه

بيْعَلّقُوا أشْعَـارْ

وْبَسْ بالْبِكِي

وْكِتْرِ الْحَكِي

مْنِفْهَمْ

وْتِجَّـارْ نِحْنا بْحَقّنا تِجَّـارْ

بِعْنا الْكَرامِه .. والشَّرف .. والدَّار

وْأنا مِحْتـارْ

شُوهالعربْ

*****

قام ألله حَطّ عَ قْبالُنْ شَعِبْ

وْجَبْلُو وَصايا

وْصارْ ألله يْعَلّمُو .. تَـ يْطَبّعُو

قاموا العَرَبْ عِلْقُوا مَعُو

وْشُو هالشَّعِبْ

مِتْلِ الْعَرَبْ .. راسُو تِنِحْ

مابْتِنْفَعُـو

لا واسْطِةْ كِلّ الرُّسُلْ وِالأنْبِيـا

وْلابْتِمْنَعُـو

قِلِّةْ ضَميرو

يِقْتُلْ وِيِزْنِي بْلا حَيـا

وْصار الْخَبِطْ كِل يَومْ بَرَّا تِسْمَعُو

وْخِسْرُوا الْعَرَبْ

وِتْفَرْطَعُـوا

وْمابْيِقْنَعُوا

وْبَعْدُن بْيِحْكُوا

بالقلم والخيلْ

وْبالرّمِحْ واللّيلْ

والبتّـارْ

والقائد الجبّارْ

وْأنا مِحْتـارْ

شوهالعربْ

*****

وْطَفْشُوا عَلَى دِنْيا الْغَرِبْ

وْعِنْد الْعَرَبْ

مافي فَرِقْ

وْشُوالْغَرْب يعْنِي وْشُو الشّرِقْ

حِمْلُوا مَعُنْ عاداتْهُمْ

وِتْفَرَّقوا

وْضاعوا بِدِنْيا الْعِلِمْ

وِبْدَيَّاتْهُمْ

حَبْسُوا الْعَقِلْ

وِتْشَرْدَقُوا

بْحِرِّيِّةِ التَّفْكيرْ

وِتْشاطَروا بالْحِقِدْ وِالتِّكْفيرْ

وِبْلَمْحِ الْبَرِقْ

هَدُّوا البْراج الْعالْيِه

وْطاف الْغَضَبْ

وْصاروا مِتِلْ لَعْنِه

وْصاروا جالْيِه

بالأرْض مَكْرُوهَه .. بْمَبادي بالْيِه

وْلابْيِقْبَلُوا يِتْنَوَّرُوا .. وْلايْغَيّروا الأفْكارْ

وْمِحْتارْ إي مِحْتـارْ

شوهالعربْ

******

شوهالْعرب

نَكْشُوا الدّني

وْماتْعَلَّموا يْربُّو صديقْ

لابالْهَمِسْ عمْ يِفْهَمُوا وْلابِالزّعيقْ

شوهالعرب
كاس انْتَلى بِالْهَمّ .. كيف بْيِنْشَرَبْ

وْتاتْشَبْشِب النّيْرانْ بِجْهَنَّمْ

إجـا

الشِّيْطـان صَوب بْلاد مامِنْهـا رَجَا

بَلَّش يْشَمِّطْ رووسْ

وِيْطَعْمي الْحَريْق

لَحْمِ الْمُلُـوك

وْلامَلِكْ مِنُّو نَجَـا

شُو لَحِمْ !.. كِلُّو دْهُونْ مِنْ مال النّفاقْ

وْسَقْسَق الدَّم الْفاسِد بْفِرْن الْعِقابْ

وْلَمَّا نِشِفْ

بَيَّنْ عَ شَكْل وْجُوه أطفال الْعِراقْ

وِالأبْرِيا بْلِبْنانْ وِفْلِسْطينْ

وِسْمِعِتْ صَوت انْشَقّ مِنْ باب السَّما

وْبِيْقِللّهُمْ عَ النَّـارْ

ياحِكَّـامْ

عَ النَّـارْ

ياظِلاَّمْ

عَ النَّارْ يـا أشْرارْ

وْدَخْلوا الْعَرَبْ عَ النَّـارْ

مشْ كِلّ الْعَرَبْ.