شَـعـرِك

شَعرك يا لَون الرّيح

وِتْعَتّقْ ...

يَـا جرحْ تِمِّ الْوَرْد

وِتْفَتّقْ ..!!

نازل مِتِل شِي خْيـَال ..

مارِقْ مِتِلْ مِرْسالْ ..

طالِعْ متل شي مَمْلَكِي

بالْبـَـالْ ..

أخْوَتْ متل نَيْرونْ

أَهْوَجْ متل

كانـُـون ..

كِلْ مَـا تْغَبَّـر مِتِلْ

شي عِتَّـالْ

بِتْنَفّضِي نْجُوم السّما

عَـنُّـو ...

آخ ..!!! لولا

بتعرفي إنّو ؟؟؟

لَون الْحَـلا مْنِ الْوَرْد

ما بْيِنْشــالْ ..!!!

يا شَعْرِك ..!!

نْزُول الشّتي

بالْجِرِدْ

بِيْجَرِّح خْدُود السّما

تِجْريـْح

مِن شَعرِك بْيِطْلَعْ

قَصايِدْ وَرْد

وْمِن شَعرِك بْيِنْزَلْ

مسيح الرّيـْح

لولا وِصِلْ عَا خَصْرِك

بْيُوصَلْ رَبيـعْ

إيْـد الزّهِر بِتْجَمّعُـو

بْجِرْن النِّدي

مِتْلِ الصَّبيـْع ..

بْتِمْرُقْ عَ خصْر

الْمَوقَدي

بِتْكُـون عَمْ تِقْطُفْ دَفَـا

بْتِقْطُفْ مِنِ الْجَمْر

الْغَفـا

يَـا شَعرك الْ مِرْتـاح

عَ كتافك

بِيْخَرْبِط الألـوان ..

شي بْيِفْرَح بْنَـوَّار

شي بْيِزْعَل بْنيْسَـانْ

بْيِسْبُق عَ نَهْر الشَّـوق

صِفْصـافِكْ  

مِنْ كِتِرْ مـا جُوعـانْ

مِنْ كِتِرْ مـا عَطْشـانْ

بْيُـوصَلْ عَ وِجِّـكْ

عَ التَّعَب هِلـْكــانْ ..

بِيْصيـْر يِتـْنـَقَّـلْ

عَلى ضْفـَافِكْ

يـا كُل خْدُودِكْ

يِشْرَب شْفـافِكْ.