النَّـهـر
بْيِمْشي
وْمـَالُو خْيَـالْ
وْبِيْضَلّ يِمْشِي بْهَالدِّنِي
يْفَرِّق سْلال سْـلالْ
بْيَعْرِفْ طَرِيْقُو مْنَيْنْ
ما بِيْغَيّرُو
وْلَوْ طَمَّشُوا الْعَيْنَيْنْ
بِشْخَاتِيـرْ
نَفْس الطَّريق بْيَاخُد
وْبِيْرُوحْ
مَرَّه جْنُوبْ .. مَرَّه شْمَالْ
مْغَيِّبْ طَرِيْقُو .. مْعَلّمُو بِجْبَالْ
بِبْـلاد
وْمُدُنْ
قَدَّيْشْ حَامِلْ لِلدِّنِي
مْكاتيب فيها رْجَالْ
وْشُو قـاطِع مْهَاويـرْ
ماشِي كْتِيـر كْتِيـرْ
ت يْسَلِّم عْلَى الْبَحْر وِيْقِللّو
يابحر .. كيف الْحالْ
بْيِمْشِي ..
إذا بِيْشُوفْ صَخْرا بْيِنْحَتَا
بِيْصَيِّرا تِمْثـالْ
وِنْ شافْ جُورَه .. بْيِطْمِرا
نْ كانِتْ غَمِيقَه كْتيرْ
بِيْنِطّ مِنْ فَوقَا .. وِبْيِنْقِلِبْ شَلاّلْ
دْروبُو نْزُولْ .. نْزُولْ
نْ شاف الْقَمَر طَالع
وْتَعْبَان بِالطَّلْعَهْ
بْيِعِزْمُو عَ الْمَيّ .. بِيْقِللّو نْزَال نْزَالْ
وْمرَّاتْ مِنُّو لَحَالُو بْيِنْعَس وْبِيْرُوقْ
بِيْرُوقْ وِبْيِصْفَى
وْبِيْصيْر فَاضِي الْبَالْ
وْبِيْلَمِّع مْرَايِيْ
بْتِمْرُق غْيُوم الْ بِالسَّمَا
وْبِتْصير تِتْمَرَّا
شِي زْغَارْ
بِيْضِيْعُوا بِوَهْرِةْ مَوْجْتُو
شِيْ طْوَالْ
وْكِلْما مُوسيقَا الشّوق
بِتْهَيِّصْ
مابينْ ضِفِّه وْتانْيِهْ
بِيْلِفّ جِسْر مْنِ الْخَشَبْ
عَ الْخَصر مِتْل الشَّالْ
بْيِمْشِي
مْعَبَّى مَيّ
وِمْحَمِّل تْراب
وْسَمَكْ
شِي بِالشَّمِسْ بِيْكُونْ .. شِي بِالْفَيّ
وْتَيْخَفِّف مْنِ الْحِمِلْ
بِيْهِزّ بِالْغِرْبَالْ
بْيِسْقِي الْوَرد وِالشَّوك
قَلْبُـو كْبيـرْ
وْكِلْما هَلِنْواعيرْ
بِتْعِنّ عامَهْلا
بِيْغِصّ بالمُوَّالْ
بْيِمْشِي
مِتِلْ مِرْسَالْ بَين السَّمَا والأرض
بَين الشَّرِقْ وِالْغَرب
وْعامين يِقْرا وْيِفْهَم المِرْسالْ
بْيَعْرِف بِإنُّو الْبَحر مَيّ وْمَالْحَه
بْيِرْكُدْ
تَيَعْمِلْ خيرْ
بْيِرْكُد بْنِيِّه صالْحَه
وْبِيكِبّ حَالُو بالْبحرْ
في ناس بِيْقُولُوا انْتَحَرْ
وفي ناس .. بَسّ قْلالْ
بْيِفْهَمُوا بالحُبّ
وْبِيقَدّروا الأفْعالْ
