صَوتـِكْ

عصام يوسف *

شُـو صوتِك .. الفيروز !!

شُو بحِّة قَصَبْ ..

شُو دفْقِة الشَّلال ..

شُو لَون الدَّهبْ ؟؟

لا... هالحَكي كِلُّو انْكَتَبْ !!..

***

صوتِكِ لْ بَعْدُو ما انْرَسَمْ .. ما انْقَالْ

صوتِكْ يا كلِّ لْ ما انْحَكَى

إلاّ خَمِرْ

مَرَّه دَلَقْ .. مَرَّه تَكَى

مِتْل السُّؤالْ

بيقول كِلِّ لْ ما انْحَكَى

وْ بِيْخَرْبِط بْكِلْشـي انْقَالْ

***

صوتِكِ لْ بِيْعَلَّمِ الْوَرْدِه الْحَكِي

شَهْـقِةْ دَفَـا بْقَلْبِ الصَّقيعْ

وْ بِيْعَلِّم الدَّمْعَه الْبِكِي

بِتْكُون مِحَّايِةْ حَكِي

بِتْصيرْ مِحَّايِةْ رَبيـعْ

***

أللـَـه

شُو تْرَوْحَن الرِّيح  بْهالِجْبـالْ

شُو سَلْطَن اللَّيْـل

بَلا ألْفِيِّـة نِدِي

قـال بِيْكَفِّي عَ جَنْبُو تِقِعْدِي

كان الصَّدى

مَرْقِةْ قَصيدِه عَ الخَيالْ 

صار الصَّدى

مَرْقِةْ حَلاكي عَ الْجَمـالْ

وْ رَهْجِة دَفَا صوتِكْ

  عَ نـار المَوقَدي