"جماليا" يرحب بـِ"جولييت بدر"

سَلِّة زهِرْ

وِصْلِت عَ غَفْلِة مْنِ "الضَّهِرْ"

وِصْلِت مِتِلْ نَغْمِة زَمِرْ

وِمْلَوَّنِة بْنَفْحِة عِطِرْ

"كَومِة عِطِرْ"

باقِةْ شِعِرْ

باقِةْ جَدايِلْ

مِنْ شَعِرْ حِلْوات خَلْوات النَّهِرْ

وِمْشَكَّلِة

بْرَبْطاتْ مَشْغولِة مِنِ جْدايِلْ مِهِرْ

شِلِّة أميرات السِّدِرْ:

بِتْغار مِ الشِّقْر السِّمِرْ

وِبْتِحْسُد السِّمْر الشِّقِرْ

 وِزْنُودْ !!

بِتحطِّم صَخِرْ

وِعْقولْ بِتْطَوِّع دَهِرْ ..

انْدَلْقِتْ مِنِ السَّلَِة حَكَايا

تْدَغْدِغ خْبايا العِمِرْ:

شو كانْ يِتْباهى الخَمِرْ

بِشْفاف .. بِتْحَلِّي القَطِرْ

بِعيون للسَّاحِرْ سِحِرْ

بِقْلوب تِعْشَق عَنْ زِغِرْ

تِكْبَر بِعِشْقا عَ الكِبِرْ

أحْلام ..

مَوجاتِ البَحِرْ

لَو عَصْفِت الرِّيح العنيدِة،

قْبَالا،

تِتْراجَع قَهِرْ ..

سِيْراتْ مِنْ تَلجْ وْجَمِرْ

نِزْلِت مِنِ السَّلِّة هَمِرْ

أيّام مابِدْها سَطِرْ

يِكْفيكْ تِذكِرها ذِكِرْ

  واسْرَحْ وإنْتَ مْغَمِّض عيونَكْ

بأنْوار الفِكِرْ

مغْزى الصِّفِر واللاّنِهايِة

وْلا نِهايِة لَلصِّفِرْ

ناخُد من المَغزى جِسِرْ

وِنْسافر بْليلِ السِّفِر

تَـ نْضوِّي للنَّاس الطَّريق

وْنِعْبْرُو شِبْر وْشِبِرْ

بِعنادْ وِجْلادِة وْصَبِرْ

قبْضات أبْطالُو الحِمِرْ

ما بْتِرْتِخي مَهْما الزَّمانْ

يْسَيطِر عْليه العِهِرْ ..

إسَّا الِعْيون مْغَمَّضَة

انطلْقِت، كإنَّا، مْنِ الأسِرْ 

والسَّلِّة !!

آه شو فيها قِصَصْ

عَنْ ناس بِزْمان الطِّهِرْ

واعْيادْ مِنْ قبْلِ الصِّيامْ

وِصْيامْ مِنْ بعْد الفِطِرْ

وِاشْواط ما إلْها مَدى

وْكِلْمات عَمْ تِهدُر هَدِرْ

واعْراس

شو يْجِنّ الفَرَح فيها

وْيِتْباهى الضِّهِرْ

واوْلاد بِتْشَعشِعْ ذَكَا

عْيُونُنْ بِأحْلام البِكِرْ

آمال تَـ يْعِمّ السَّلامْ

ما يْضَلّ جوعْ وْلا فِقِرْ

لا آخْ يِتْوَجَّع بها لا ضْعيفْ

أوْ يِحْزَن صِدِرْ ..

كْبيرِة السَّلِّة وْبطِنْها

كْبير وْبيْساعْ

مْنِ الحكايا

غْمار

تِغْنَى بالغِمِرْ

بْصَلَِّي تَـ تِبْقي زْهُورْها

وِتْفوح مِنْ شَهْر لْشَهِرْ

وِيْضلّ يِتْغاوى الورَق

وِيْضَلّ يِدْفُقْ هالحِبِر 

 وِتْضَّلّ تِحيي قْلوبْنا

أشْعار مِنْ جولْيِيْتْ بدِرْ