كْبيرِه الدِّني وْبِتْساعْ

كْبيرِه الدِّني وْبِتْساعْ
وْخَيْراتْها بْتِكْفي
لْتاني دِني وِشْوَيّ
وْبَتْرولْها
مِن هَون لِلمَرّيخ بِيْدَفِّي
وِبْحُورها بِتْطُّوْف

خَيْر وْمََيّ
كْبيرِه الدِّني وِزْهُورْها
بْتِعْطي وْلا بِتْمَنِّي
كْبيرِه الدِّني وِطْيورْها
للحُبّ بِتْغَنِّي
وْفيها شمِسْ
وْمَطْرَحْ ما بَدَّكْ فَيّْ

كْبيرِه الدِّني وْبِتْساعْ
وْخَيْراتْها بْتِكْفي
لْتاني أرضْ وِشْوَيّْ
وْمَرَّات مابِتْساع خَيّْ وْخَيّْ

كْبيرِه الدِّني
وفيها بَشَرْ بِتْخَجِّـل الْحيتان
الحيتان يِمْكِنْ يِشْبَعُوا
بِتْخَجـِّل الصُّوَّان
يِمْكِن حْجاروا يْدَمّعوا
لَو فكَّـر الإنسان
مْن الكون شُو آخِِد مَعُو
مْنِ بْحُورْها... حَبِّةْ مِلِحْ ؟
وِلاّ شِيْ نقطه ميْ !

كْبيرِه الدِّني ...
صْواريخْها حلُّوا مَحَـلِّ الوَرْد
بارودْها غَطَّى عَ أحْلَى نَهدْ
جِرَّارْها خَرْبَـَطْ جَمال الجِردْ

جِزَّارْها

سَكَّتْ نَغَمْ حَسُّون
حِكَّامْها خَلُّو الشَّعِبْ مَدْيون
لِقْمِة غَنِي في سَكِرْتُو
بِتْشَبِّع المَليُون
يِلْعن هَواكي يا دِني
الْبِيْضِرّ صار السَّوْسَني
فاسِدْ طَغَى وْمَلْعُون
لَو وَفَّروا بالدُّوَل هالْعُظْمَى
مَصْرُوفْ لَنُّو مُؤتَمَر
لَو وفَّرُوا مصْرُوف
شِحْنِة سَفينِهْ عَ القمَر
لَو وَفَّرُوا مَلْفُوف
شِبْعِتْ ما أكْليتُو البَقَر
لَو وفَّروا مْدافِعْ
لَو وفَّروا صْواريخ
لَو وفَّروا رِحْلات عَ المَرِّيخ
لَو وفَّروا التّاريخ
ما كانْ طِفْل بْهالدِّني بِيْجُوع
وْلا كان بَيّ بْهالدِّني بْيِدْمَع

....

بِاسْمِ العَدالِهْ
دَبَّـحُوا شْعُوب الأرضْ
بِاسْمِ العَدَالِهْ
سَيَّجُوا الدِّنْيا بْبِغِضْ
وْنَصَّبُوا أزْلامْهُمْ حِكَّـامْ
حِكَّـامْ عَ الدِّنْيا
بْطُول وْعَرْضْ
مْبارِح عَلى فْيِيتْنامْ
وْبَعْدا على كُوبا
سَيْف الغَدِرْ ما نام
مْسَلَّّط عَلَى شْعُوبا
مْبارِح عَلى فْيِيتْنامْ
وبعدا عَ كُورِيَّا
وْبُكْرَى عَلَى أحْلامْ أطْفال سُورِيَّه
وْما لِحِقْ شافِيْز قامْ
صْواتُوا يْوَدِّيـَّا
تا قَيـَّموا الْماقام
وْزَرْعُوا الدِّني ألْغَام
إصْحى يا شعْب الشَّام
وِمْنِ العِراق فْهام
شو قَصْد أمريكا