حمص عاصمة العالم

هديّه لَ: أبو ويليام بالحميديّه ولكل الناطرين

السّاعه العتيقه

لْبستها بالإيد

صارو السّنين يْعَرِبْشو عْليّي

وْجبْت القناطر

منْ زمان بعيد

سورات للطرقات عيديّه

..

ياحمص

بدّي آخدِك تِشْريد

عاكَون صدْفِه

عاسَما لْقيِّه

تاكِلّ ماغْيومِك

عَلَى القرميد

تِنْحَفّ

يِطْلَعْ ألْف جِنّيّه

..

ياحمص يوم الأربعا

هالعيد

الصّفّى سجَر

ببلاد برّيّه

بكرا عَ كَعبو

بْيدْبَل التّنْهيد

وبيضَحِّك قْناديل سَهْريّي

..

ومَهْما يْزيد الطّقِس

فيكي رْعيد

وْتِنْهَدّ فيكي بْيوت شعْريّي

بدْهُن حْجارِك يطْلَعُو

مْنِ جْديد

كْنيسِه وْجامِع بالحَميديّه

وْبيناتْهُن

تِمْثال حرّيّه.