كان يا ما كان
وين الزمان؟؟!!
وين الزمان اللي مضى وِلْ كـان
وأيـــام فيها رجـع للماضـي
وجيـران عم يتقـاسمو الضحكه
وجـاره هموم القلب عـم تشكي
والكل عا حكم القـدر راضـي
كان الهـنا بالنـاس بالإيــمان
وما بعـمرو حكـَّـم القاضـي
كلمــة شـرف كـانت بتقضي
وفلان ما عمرو اشتكى ع فـلان
والقلب كـان من الحقـد فاضي
***
كـان القمر ع سطيـحة الجيران
يـِلفـي بِنـورو يبــدّد الآلام
لمـّا بوجهو يطل عالـــوديان
يعمل صور عن قدرة الرحمـان
والصبح كـان يْفـَيِّـقْ النّـيَّام
بضحكة فجر حامل معو المرجان
قــديش حلوه كـانت الأحـلام
يا ريـتها بترجع هـاك الأيـام
ونعــــود نسمع ستَّك وستّـي
يحكـو حكـايـا "كـان يا ما كان"
بيوت الهـنا شبابيـكها بالصيـف
عليها صبـايا الحسن عم توعـى
وكلمة هــلا المْشَرَّعـه للضيف
بتحسّهـا بالقلـْـب مسموعــه
عــادات حلوه الطِّيب كَـوّنهـا
بهمسه لطــيفه الطُّهر لـَوَنـْها
بتسـمع الأمِّ بْـآه موجــوعـه
ناطْــرا الغيَّـاب يمّا الطــيف
يحمـل وجــوه الغـايبه عنهـا
وهموم يجــلو بقلب مـزروعه
***
حكمة عمّك أبو الحب:
كـان الماضي بأنـــوارو
ليــلو يفـرح بنهـــارو
بليلو حكايـات الحـلويـن
نهـارو ضحكات زغـارو
صرنـا بعالــم مهمومين
من المحــبه محرومـين
لا الخي بيعـــرف خيُّو
ولا الجـار بيحكي جـارو